A Ucgal alerta do perigo de que os salarios suban menos que a inflación

O ano 2023 fechou na Galiza cunha suba media interanual dos salarios (incluíndo todas as remuneracións, tanto en metálico como en especie) de 2,9% no último trimestre e en termos brutos. Desta maneira, alcanzáronse os 2.095,8 euros por traballador e mes, segundo datos publicados esta sexta feira polo Instituto Nacional de Estatística (INE) a través da Enquisa trimestral de custo laboral (ETCL). Este incremento está por baixo da media de avance estatal, que foi de 4% e 2.359,38 euros/mes, o que supón 263 euros máis que na Galiza. Por outra parte, o custo laboral medio por persoa traballadora e mes (que inclúe tamén todas as cotizacións sociais) subiu 4,2% na Galiza no cuarto trimestre de 2023, con 2.821,09 euros, tamén por baixo da alza de 5% no Estado español, que se eleva a 3.145,99 euros, a súa cifra máis alta nun cuarto trimestre desde o ano 2000. Desde a CIG, Francisco González Sío, en declaracións a Nós Diario, puntualiza que os datos máis fiábeis para a Galiza “son os do Consello Galego que estudan os convenios e despois fan unha medida ponderada co número de persoas traballadoras”. Porén, recoñece que “o salario galego é máis pequeno, sobre todo se se reparte polas horas que traballamos”. Os salarios medran 2,9% na Galiza, por baixo do incremento estatal: canto cobran as galegas e galegos? Pola súa parte, a UXT, a través do seu secretario xeral na Galiza, José Antonio Gómez, admite a Nós Diario o dato do INE, mais matiza que “os datos que temos de negociación colectiva, facilitados polo Ministerio, indican que a suba salarial en decembro foi de 3,57%, por enriba do 3,46% estatal”, polo que “se evidenciaría que o Acordo interconfederal de Negociación Colectiva está a dar os seus froitos”. Non obstante, Gómez indica que “non se pode baixar a garda”. Neste sentido insiste en que para manter o poder adquisitivo da clase traballadora “hai que seguir controlando os prezos” ademais de “favorecer a alza dos salarios”. En opinión da secretaria xeral de CCOO na Galiza, Amelia Pérez, “os datos do INE confirman que a Galiza segue a ser o vagón de cola”, unha situación que, explica a Nós Diario, “anímanos a seguir na negociación colectiva para que se reparta a riqueza”. Esta sindicalista, en relación aos salarios, non entende “que haxa moitas empresas que gañan moito diñeiro sen trasladar esa situación aos seus cadros de persoal”. Máis horas de traballo Outro dato que dá a coñecer o INE é o da xornada laboral. Na Galiza indica que é de 152,5 horas pactadas por persoa traballadora e mes (cando é de 151,2 horas no Estado español, das cales son 125 horas son efectivas (125,9 no Estado) e 28,3 horas, non traballadas (26,1 no Estado). A tempo completo no país a distribución é de 169,1 pactadas, 138,1 efectivas e 31,8 sen traballar. “Traballamos máis horas, iso está claro”, admite González Sío. Este sindicalista da CIG introduce outra problemática: a das horas que se contabilizan na xornada laboral. “En moitos convenios, na negociación colectiva emprégase a trampa de non contar como tempo efectivo de traballo os 15 minutos de descanso que figuran no Estatuto dos traballadores”, sinala, “polo que cada ano sumarían unhas 56 horas”, engade. Seguimento "masivo" da folga na sanidade privada "malia as manobras e presións da patronal" Diante desta situación, Pérez considera que na Galiza “hai que cortar a dinámica que existe en moitas empresas de estar de maneira presencial nelas e traballar nunha maior motivación a través dunhas xornadas laborais que permitan traballar e vivir”. Menor poder adquisitivo As cifras salariais chegan un día despois de que se dera a coñecer, tamén polo INE, o dato do Índice de Prezos de Consumo (IPC) e a suba de determinados produtos, cunha taxa interanual na Galiza de 3,2%, cando é de 2,8% no Estado español. Desde a Unión de Consumidores da Galiza (Ucgal), o seu secretario xeral, Miguel López, considera que a situación é “preocupante”. Explica a Nós Diario que “no Estado español recupérase certo poder adquisitivo por aumentar os salarios ao redor dun 4% e ter inflación en 2,8%”. No caso galego sería ao revés “por ter unha suba salarial de 2,9% fronte a unha inflación de 3,2%”. A situación aínda é peor, segundo López, “nos alimentos, con subas próximas a 6% polo que seguimos perdendo capacidade para encher o cesto”. Por este motivo, o responsábel de Ucgal sinala que o incremento salarial "queda anulado polo insistente escenario de inflación". Para o futuro, López alerta de que constatou que o incremento salarial que observou nos últimos convenios colectivos "non teñen unhas porcentaxes de aumento tan significativas como as que había nos últimos anos". Por este motivo, advirte que se os salarios seguen coas porcentaxes de suba actuais e os produtos básicos aumentan tamén como na actualidade "podemos volver á senda de poder adquisitivo no Estado que sería aínda máis grave no caso galego". Galiza, un dos países da UE onde máis porcentaxe do salario se dedica a pagar o aluguer: 35 de cada 100 euros Preven 33% menos de gasto nas familias en Semana Santa Unha das medidas para constatar a situación económica das familias é a intención de gasto en momentos puntuais, como é o caso das vacacións. Nesta Semana Santa, segundo o Observatorio Cetelem, o gasto medio estimado é de 346 euros, 38 euros menos que a media estatal, o que supón unha redución de 33% respecto á intención de desembolso manifestada no mesmo período do ano pasado. O mesmo estudo presentado esta sexta feira indica que só 15% da poboación ten intención de aumentar o seu gasto respecto ao ano pasado nestas vacacións, mentres que se mantén a porcentaxe de consumidoras e de consumidores que prevé realizar o mesmo desembolso que en 2023 (49%) e aumenta o daqueles que o reducirán (36%). Botar man de amizades O informe, realizado a partir de mil enquisas en todo o Estado español entre maiores de 18 anos, sinala que as actividades que máis realizarán este ano as galegas e os galegos son descansar e quedar con amigos, con 50% das mencións; viaxar, con 42%; e saír de restaurantes, con 37%. No caso de viaxar, 49% ten intención de facelo nunha zona rural próxima, aloxándose en hoteis e apartamentos. Outro 17% viaxará tamén a zonas rurais, aínda que en casa de familiares ou amigos.