A frota ve inminente a aprobación dos polígonos de eólica mariña: "O oligopolio enerxético ten moito interese en comezar"

O reloxo está en marcha desde o pasado 25 de marzo para o desembarco da eólica mariña na Galiza. Nesa data rematou o prazo de alegacións ao borrador do proxecto de Real Decreto para a produción de enerxía eléctrica de orixe mariña. Numerosos colectivos presentaron alegacións ao mesmo. Desde a Plataforma en Defensa da Pesca e dos Ecosistemas Mariños (PDPEM) explica o seu voceiro e avogado especialista en Dereito Pesqueiro, Torcuato Teixeira, que non só está en perigo o sector pesqueiro galego e a súa importancia socioeconómica, senón tamén a preservación dos ecosistemas mariños e quérese evitar que, igual que acontece no rural, "acabemos tendo zonas de costa baleiradas”. Desde a plataforma, Teixeira explica a Nós Diario que “se na Galiza se pon en perigo a pesca en concellos como Cedeira, Muros, Boiro ou Burela, o que están promovendo [di en referencia ao Ministerio para a Transición Ecolóxica e o Reto Demográfico] é que estas vilas perdan poboación e queden tamén baleiras”. O sector pesqueiro galego leva dous anos traballando para afrontar este momento. Logo de alegar ao Real Decreto, agardan, di Teixeira, que “a resposta vai saír en breve porque a presión que está tendo o Ministerio por parte do oligopolio formado por Iberdrola, Naturgy, Endesa e Repsol é moi forte, teñen moito interese en empezar a meter xa muíños no mar”. Fronte aos intereses económicos das principais enerxéticas do Estado no mar galego, Torcuato Teixeira opón as demandas que a plataforma leva case tres anos situando sobre a mesa. Como resultado, teñen logrado o compromiso do Ministerio de Teresa Ribera —que "apareceu por sorpresa" na reunión en Madrid e comprometeu diálogo— de convocar para este mesmo mes de abril, “na semana do 15 ao 20 posibelmente”, a primeira reunión dunha “mesa de traballo”. O Goberno español seguirá adiante coas poxas da eólica mariña malia carecer dos estudos sobre o impacto na pesca Nesta mesa estarán sentados os Ministerios competentes (Transición Ecolóxica e Agricultura, Pesca e Alimentación), o sector pesqueiro e os técnicos do Instituto Español de Oceanografía (IEO). Desde o sector na Galiza agardan que sirva para “ofrecer un pouco de cordura e animalos a que as présas do sector enerxético non estean sobre as dun Goberno que ten que perseguir o interese xeral e non o particular das empresas”. Neste foro, o sector ten reclamado os datos oficiais da importancia socioeconómica da pesca na Galiza, datos que están en mans do Ministerio de Agricultura e Pesca e que agardan que sirvan para “decidir coa mellor información posíbel”. A importancia do sector Cos datos que o sector recolleu, coas 184 zonas reservadas para a eólica mariña nos caladoiros de pesca da frota galega, estarían en risco 150.000 empregos vencellados a este importante motor económico do país. Torcuato Teixeira agarda os datos oficiais do Ministerio de Agricultura, Pesca e Alimentación na mesa de traballo, pero avanza a Nós Diario que, “como sector extractvo e comercializador, estamos en 30.000 persoas vinculadas co mar, que arrastra moitos outros sectores”. Os datos da plataforma indican que “cada posto directo da pesca arrastra case cinco postos directos noutros sectores, e hai case 63 subsectores da economía galega que directa ou indirectamente dependen da pesca”. Esta condición de “sector estratéxico” é a principal baza coa que as alegacións galegas ao Real Decreto estatal traballan, “non se pode pór en perigo e andar xogando con el”, di Teixeira. Ao tempo, sinala un exemplo sobre o terreo: “Se colocan aeroxeradores fronte á Coruña e Cedeira, no polígono Nor II, o de maior tamaño reservado para eólica mariña, con 120 aeroxeneradores nunha área de 140 ou 150 quilómetros cadrados, están prexudicando a frota da Coruña e de Ferrolterra. Para cuantificar isto precisamos datos que ten o Ministerio de Pesca. Esperamos datos do que suporía expulsar a frota desas zonas e os impactos medioambientais que tería”. O DEBATE | Son a pesca e a eólica mariña neste momento compatíbeis na Galiza? Alerta unánime na Galiza Concentracións coma a convocada pola plataforma hoxe en Burela (A Mariña) seguen a estela das anteriores na Guarda (Baixo Miño), A Coruña ou Cedeira (Ferrolterra). Son moitos os colectivos, sindicatos e partidos políticos que secundan as demandas do sector pesqueiro diante da ameaza que supón o plan que desde Madrid se está a facer da eólica mariña. A Plataforma en Defensa da Ría de Arousa (PDRA), a Confederación Intersindical Galega (CIG), o Bloque Nacionalista Galego (BNG), a Asociación para a Defensa Ecolóxica da Galiza (Adega) e outros moitos colectivos secundan unha loita que, en moitos casos, pasa por “reclamar para Galiza as competencias sobre a nosa costa e o noso mar”, segundo lembra Xaquín Rubido, presidente da PDRA. A este respecto tamén a plataforma presidida por Rubido apoia as demandas da Plataforma en Defensa da Pesca e dos Ecosistemas Mariños. Ademais, a PDRA ten en marcha unha iniciativa lexislativa popular para presentar no Parlamento da Galiza —remata no mes de xuño o prazo de recollida de sinaturas— para mudar a actual Lei de Pesca galega a respecto da declaración do interese da actividade pesqueira, marisqueira e a acuicultura tradicional e a necesidade de ordenar o espazo marítimo galego, “priorizando e garantindo estas actividades fronte a outras posíbeis”. Xaquín Rubido e a PDRA teñen claro que a eólica mariña ameaza o modo de vida e un dos sectores punteiros da economía galega. Critican que a Xunta da Galiza non demande de Madrid o traspaso de competencias na materia que prevé o actual Estatuto de Autonomía e tamén afean o Goberno do Estado que os Plans de Ordenación do Espazo Marítimo (POEM) “non nos teñan en conta”. De feito, estes plans estatais non definen as zonas pesqueiras galegas, “pero si teñen reservado un espazo claro para a 'seguridade nacional', iso está claramente definido, pero os recursos pesqueiros non aparecen por ningures”. As autonomías con máis peso no PIB xeran menos enerxía: un estudo abre o debate da compensación da produción "Onde hai eólicas non hai pesca", advirte o sector O sector da pesca coincide nun dato que actualmente semella o motor de todo o movemento xerado arredor da eólica mariña. A foto fixa que preocupa na Galiza está en Viana do Castelo (norte de Portugal), alí un destes parques eólicos no mar ten feito desaparecer a pesca nun radio de varios quilómetros arredor, denuncia o propio sector pesqueiro da zona. Torcuato Teixeira recoñece os contactos co país veciño, “tamén participa Portugal e é moi importante ver e escoitar as consecuencias menos positivas, niso están as frotas asturiana, galega e canaria”. Xaquín Rubido explica que “a experiencia portuguesa é moi clara, é a espada de Damocles sobre o noso sector. Na práctica, en Portugal, "onde hai eólicos non hai pesca”. Rubido critica que a resposta da Administración ante este perigo para o sector pesqueiro sexa “esa tendencia a converter todo en cartos e indemnizacións no canto de garantir os nosos dereitos”. “Son polígonos que metes no mar, con estruturas de formigón e aceiro de 250 toneladas, uns monstros que teñen un grande impacto”, explica Teixeira. Tamén estas estruturas ameazan a biodiversidade, e mostra diso é a preocupación manifestada pola Sociedade Galega de Ornitoloxía, que organizou en xaneiro un congreso sobre aves mariñas en Estaca de Bares e as expertas amosáronse “preocupadas” polo impacto sobre as aves. A secretaria técnica de Adega, Belén Rodríguez, critica que a proposta de ordenación do espazo mariño para a eólica “fíxose sen participación da sociedade, non tiveron en conta o sector da pesca, cando na Galiza é estratéxico”. Sinala a este xornal que, “de novo, pretenden impornos unha ordenación feita sen participación social e sen os suficientes estudos de impacto”.