Segundo concluíu un novo informe do Banco Mundial, a pesar do seu alto potencial para promover a prosperidade mundial, a metade dos 75 países máis vulnerábeis do mundo, enfrontan por primeira vez neste século unha fenda de ingresos coas economías máis ricas que é cada vez maior. “Aproveitar ás súas poboacións máis novas, a riqueza dos seus recursos naturais e o seu gran potencial de enerxía solar pode axudalos a superar este retroceso”, indica a institución financeira institucional no informe A gran regresión: Perspectivas, riscos e políticas nos países que reciben financiamiento da Asociación Internacional de Fomento publicado esta segunda feira.
O documento ofrece a primeira mirada integral con respecto ás oportunidades e riscos que teñen en fronte os 75 países elixíbeis para recibir doazóns e préstamos sen intereses ou a un interese moi baixo da Asociación Internacional de Fomento (AIF) do Banco Mundial. Estes países albergan unha cuarta parte da humanidade, é dicir, 1.900 millóns de persoas.
Nun momento no que as poboacións están a envellecer en case todos os demais lugares, a proporción de traballadoras e traballadores novos dos países que reciben financiamento da AIF irá en aumento até 2070, o que representa un enorme “dividendo demográfico” potencial. “Estes Estados tamén teñen unha gran riqueza de recursos naturais e un alto potencial para a xeración de enerxía solar, e contan con importantes reservorios de depósitos minerais que poderían ser fundamentais para que o mundo poida realizar a transición cara á enerxía limpa”.
Aínda así, explica, experimentan unha regresión histórica. No período entre 2020 e 2024, o ingreso per cápita medio na metade dos países que reciben financiamiento da AIF —a proporción máis alta desde o inicio deste século— creceu máis lentamente que nas economías ricas. Así, a fenda de ingresos entre estes dous grupos de países profúndase. Un de cada tres países clientes da AIF é máis pobre, en media, do que era antes do inicio da pandemia da Covid-19.
A taxa de pobreza extrema octuplica a media no resto do mundo: unha de cada catro persoas en países que reciben financiamiento da AIF subsiste con menos de 2,15 dólares estadounidenses ao día. Estes países representan na actualidade o 90 % de todas as persoas que sofren fame ou malnutrición.
“O mundo non pode permitirse darlles as costas aos países que reciben financiamento da AIF”, afirmou Indermit Gill, economista xefe e vicepresidente sénior do Grupo Banco Mundial. “O benestar destes países sempre foi fundamental para a perspectiva de prosperidade mundial a longo prazo. Tres das actuais potencias económicas —China, India e Corea do Sur— foron nalgún momento prestatarias da AIF. Todas elas prosperaron de forma tal que puideron reducir a pobreza extrema e mellorar os niveis de vida. Con axuda do exterior, o conxunto de países que hoxe reciben financiamento da AIF tamén poderían facelo”.
Más da metade de todos os países clientes da AIF —39 en total— atópanse situados na África subsahariana. Catorce deles —principalmente pequenos estados insulares— están en Asia oriental, e 8 en América Latina e o Caribe. En Asia meridional, todos os países, salvo India, reciben financiamiento da AIF. Treinta e tres son estados fráxiles e afectados por conflitos.
No informe sinálase que os países que reciben financiamiento da AIF necesitarán un importante apoio financeiro internacional para poder avanzar e reducir o risco dun “estancamento prolongado”. Tamén será fundamental colaborar máis con eses países en cuestións de política mundial —como a loita contra o cambio climático, a axuda para reestruturar débedas dunha maneira máis oportuna e eficaz e o apoio para o comercio e os investimentos transfronteirizos— de modo que poidan evitar perder unha década de desenvolvemento.
