martes 28/09/21

A crise industrial galega golpea nas antigas empresas públicas privatizadas

Este 24 de xullo fanse 24 anos da privatización de Alcoa, unha das empresas con pasado público que arrastra problemas na Galiza.
Sede da Sociedade Estatal de Participacións Industriais (SEPI).
Sede da Sociedade Estatal de Participacións Industriais (Foto: SEPI).

A crise industrial que padece Galiza está estreitamente relacionada con procesos de privatización de empresas públicas. Firmas como Ence, Barreras ou Alcoa, outrora baixo o control da Sociedade Estatal de Participacións Industriais (SEPI),  deixan no aire a continuidade de centos de postos de traballo no país, mentres que desde diversos foros políticos e sindicais claman de novo pola volta destas industrias ao sector público.

Este sábado fanse 24 anos da privatización da antiga Inespal, empresa dedicada á produción de aluminio. Foi un 24 de xullo de 1997 cando Alcoa fixo efectiva a compra á SEPI da antiga entidade pública, propietaria das plantas de aluminio de San Cibrao (Cervo), A Coruña e Avilés e todo parece indicar que non chegará a cumprir os 25 anos como titular.

En 2019, Alcoa traspasou ao fondo suízo Parter a titularidade das factorías da Coruña e Avilés, unha operación non exenta de polémicas que aínda está a ser revisada pola Xustiza, como tamén o está o despedimento colectivo que pretende levar a cabo na planta de San Cibrao, tombado en primeira instancia polo Tribunal Superior de Xustiza da Galiza (TSXG) e recorrido ante o Supremo.

Ao mesmo tempo, a multinacional norteamericana do aluminio está a negociar a venda da planta de Cervo. Nesa operación, quere que a SEPI exerza como intermediaria, comprando as instalacións para despois venderllas a un terceiro, blindando así as súas posíbeis responsabilidades xudiciais no futuro.

Tanto no caso da planta de Alcoa en San Cibrao como no das de Alu Ibérica da Coruña e Avilés, os comités tamén exixen a intervención pública da SEPI para garantir a continuidade da actividade industrial e o mantemento dos postos de traballo, unha postura que conta co apoio do Parlamento galego e, no caso de Alcoa, tamén do Congreso das Deputadas.

Problemas no naval

Se a situación no sector do aluminio é delicada, non o é menos no naval. O Estado español conserva a titularidade dos estaleiros de Navantia en Fene e Ferrol. No primeiro deles, a empresa pública vén de anunciar a construción dunha fábrica para pilotes de eólica mariña, un sector no que se está a especializar. En Ferrol, pola contra, agardan por carga de traballo até que comece a construción das fragatas F-110 para a Armada española. 

En Vigo, o sector naval tamén está a pasar por un momento delicado. O estaleiro Barreras, xunto coa antiga Vulcano, son os expoñentes desta crise. A empresa de Bouzas leva anos á deriva, con contratos puntuais como o flotel de Pemex ou agora o cruceiro de Ritz Carlton, que non foron capaces de enderezar o rumbo da compañía, que até 1997 estivo en mans do Estado.

Outra das firmas que corre risco de desaparecer na Galiza e a pasteira Ence. En xuño cumpríronse 20 anos da súa privatización por parte do Estado español, que  agora lle pode marcar o camiño de saída se finalmente se confirma o recente auto ditado pola Audiencia Nacional que anula a prórroga da concesión, outorgada en 2016 polo entón Executivo en funcións de Mariano Rajoy.

comentarios