No pasado mes de outubro creáronse no conxunto da Galiza 242 compañías, o que se traduce en 12,9% menos que no mesmo período de 2021, segundo os datos publicados esta quinta feira polo Instituto Nacional de Estatística (INE).
Este descenso sitúa o país moi lonxe da media estatal, xa que no total de España o número de novas sociedades mercantís caeu só 2,7%, até as 7.149 firmas. En concreto, Galiza é o quinto territorio que máis cae, só por detrás de Estremadura (-24,1%), Nafarroa (-20%), Murcia (-18%) e Castela-A Mancha (-16,9%).
Destas 242 empresas, unha era unha sociedade anónima e o resto eran sociedades limitadas. En total, o capital subscrito por estas novas compañías foi de 4,66 millóns de euros.
En outubro disolvéronse 100 compañías galegas, 8,3% menos que no mesmo mes do ano pasado. Este dato sitúa Galiza como o territorio que máis baixa. Pola súa parte, ampliaron capital 75 empresas, con máis de 14 millóns.
A nivel estatal, co descenso de outubro, a creación de empresas volve a taxas negativas logo de que en setembro experimentase un incremento interanual de 3,3%.
Para a constitución das 7.149 empresas creadas en outubro subscribíronse case 192,2 millóns de euros, o que supón 5,8% menos que en igual mes de 2021, mentres que o capital medio subscrito, que se situou en 26.883 euros, retrocedeu un 3,2% interanual.
Á vez que baixou a creación de sociedades, en outubro medrou no Estado a disolución de empresas en 8,8%, tomando como referencia o mesmo mes do ano pasado, até un total de 1.919. Nos dez primeiros meses do ano constituíronse 3% menos de empresas que en igual período de 2021 e desapareceron 9,1% máis de sociedades.
