Ademais do Celta, a única escuadra galega que sobrevive na Copa do Rei é o Pontevedra Club de Fútbol, que recibe en Pasarón esta cuarta feira, ás 19 horas, todo un equipo de Primeira División como é o Mallorca.
O obxectivo dos granates non é outro que repetir a fazaña da eliminatoria anterior, na que se desfixo outro potente conxunto insular, o Tenerife.
Non obstante, o heroe daquel partido e autor dos dous tantos do Pontevedra, un Libasse Guèye nomeado hai tan só sete días pola Federación do seu país como o futbolista Sub-23 máis prometedor do Senegal, está en paradoiro descoñecido.
Convocado para comezar os adestramentos o pasado 28 de decembro, desde entón agardan pola chegada dun home que explotara na Copa logo de participar en só 262 minutos en Liga.
Tampouco estará ante o Mallorca outro home con escasa participación até o momento, Mario Ortiz (369'), quen cambia Pontevedra por Alxeciras. Porén, estas baixas non minguan o espírito competitivo do técnico granate, Antonio Fernández, quen se mostrou decidido a "facer historia".
