O trail running é unha das disciplinas de moda dentro do atletismo, e o próximo domingo, 18 de febreiro, a localidade de Muros recibirá a terceira edición do Trail Cova da Bruxa, que exercerá como Campionato da Galiza tanto no plano individual como por equipos.
Cunha cifra de persoas inscritas "próximas ás 1.000", segundo confirmaron nun acto de presentación no que tomaron parte a alcaldesa da vila anfitrioa, María Lago; o concelleiro de Deportes, Damían Torres; un membro da directiva da Federación Galega de Atletismo (FGA), Esther Pedrosa; e os responsábeis do club organizador do evento, Serres Runners, Paula Cernadas, Félix Rebollido e Mónica Rodríguez.
Este "éxito de participación" e da "comarca muradá, do atletismo e en especial do trail running", como salientou a representante da FGA, estará reflectido nun percorrido que se estrutura en catro categorías ben diferenciadas: Trail Terras de Sestaio (23 quilómetros de extensión e 1.300 metros de desnivel, equivalente ao Galego de clubs e individual absoluto, Sub-23 e Máster), Trail do Valdexería (15 quilómetros e 690 metros de desnivel, que determinará o Campionato Galego Sub-20), Trail Pedra do Corvo (8 quilómetros e 450 metros de desnivel, decidirá o Galego Sub-18 e Sub-16) e a Andaina Cova da Bruxa, non competitiva e de 11 quilómetros e un desnivel máximo de 400 metros.
Ademais, o evento será o derradeiro coa condición de puntuábel para o Campionato de España, o que significa que tamén están en xogo as 26 prazas dunha selección galega para a cal aínda non teñen praza garantida matematicamente ningún corredor ou corredora.
A lendaria Ruth Beitia estivo de visita en Ourense
A campioa olímpica en salto de altura nos Xogos de Río de Janeiro 2016, a cántabra Ruth Beitia, visitou esta cuarta feira Ourense co gallo das accións promocionais do Campionato de España de Pista Curta que acollerá a Cidade das Burgas ao longo desta fin de semana.
Tras comezar o seu percorrido na Escola Atlética de Pereiro de Aguiar, Beitia visitou a xente do Club Deportivo A Purísima e do Club Ourense Atletismo.
