O ex presidente da Real Federación Española de Fútbol (RFEF), Luis Rubiales, adiantou o seu regreso ao Estado español desde a República Dominicana e aterrou na mañá desta terza feira no aeroporto madrileño de Adolfo Suárez Madrid-Barajas. Unha vez en terra foi detido por axentes da Unidade Central Operativa (UCO) da Garda Civil pola investigación que afecta á súa etapa á fronte da RFEF e que indaga irregularidades nos contratos para xogar a Supercopa de España de fútbol en Arabia Saudita.
A defensa do ex presidente da RFEF informou a xuíz de Majadahonda (Madrid), Delia Rodrigo, de que Luis Rubiales tiña previsto volver ao Estado español desde a República Dominicana o próximo 6 de abril, alegando que se atopaba "a plena e total disposición" do Xulgado e que podería "regresar con anterioridade a esa data se así se estimase necesario e se fose requirido para iso".
De feito, a volta prodúcese despois de que esta segunda feira axentes da UCO levaran a cabo un rexistro no aloxamento de Rubiales en Punta Cana por orde da xuíz, e no que se incautou o teléfono móbil e unha tablet do propio ex presidente da RFEF.
Viaxaba "por cuestións laborais"
Rubiales explicou que viaxara ao Estado caribeño "por cuestións laborais" e que estaba a tentar "xerar recursos" para a súa familia. Ademais, negou nun avance da entrevista que emitirá esta terza feira 'El Objetivo' de La Sexta recibir "mordidas", asegurando que o diñeiro que tiña nas súas contas é froito do seu traballo.
"Estou hoxe aquí para dicir que é mentira que eu pegase unha mordida con pisos aquí (na República Dominicana). Que é mentira que teña un equipo de béisbol, que pegase un ‘pelotazo’ en Cabo Verde ou que teña terreos para a construción de hoteis en Arabia Saudita", defendeu no avance da entrevista o ex presidente da RFEF.
