Na xornada desta terza feira compareceu en rolda de prensa nas instalacións do Anxo Carro o lateral do CD Lugo, Miguel Loureiro, para analizar a derrota da pasada xornada e opinar sobre o futuro do equipo.
Para o de Cerceda "estes dous últimos resultados non embazan nada” polo que “hai que estar tranquilos, sabemos que é difícil, mais cremos en nós mesmos, no traballo que facemos co míster”.
Segundo Loureiro, o seguinte partido no Anxo Carro diante do Oviedo (domingo 25 de setembro ás 16.15 horas) será “moi bo para regresar á senda positiva" na categoría.
En relación ao mal partido da pasada fin de semana admite que "hai que facer autocrítica” e sinala que para mellorar "hai que traballar duro”. Para este xogador a derrota foi “un castigo excesivo, mais é verdade que temos que axustar algunhas cousas. Somos conscientes dos puntos para mellorar".
Explica que "a xogada do penalti chégame nunha situación límite. Vén dunha xogada un tanto desafortunada, é verdade que impido o remate, pero derrubo ao rival". Por iso admite que "temos que controlar as situacións para non ter que chegar aí".
Sobre o seu posto no campo asegura que "a posición de central non é nova para min. Podo adaptarme a esa posición” até o punto de atoparse “cómodo”.
O Real Oviedo, novo rival
Loureiro cre que o Real Oviedo "é un gran equipo, non o vai a pór fácil”. Recoñece que “é verdade que temos algunhas baixas, mais hai un persoal preparado para competir” pensando que “a xente que entre o fará con máis ganas aínda. Confío en todos os meus compañeiros".
Porén, agarda “un partido moi físico. O rival é moi forte" e sentenza que teñen que seguir a liña vista noutros partidos, "expor un partido complicado e duro desde todos os aspectos".
