O Club Deportivo Lugo xa ten substituto para o saínte Íñigo Vélez á fronte do primeiro equipo albivermello. Trátase dun vello coñecido do fútbol galego, o cántabro Pedro Munitis, que como futbolista defendeu as cores do Real Club Deportivo da Coruña durante tres tempadas entre 2003 e 2006.
De feito o seu nome soou con forza para ocupar o cargo deixado polo destituído Rubén De la Barrera á fronte do Dépor, especialmente desde que a comezos de semana fora visto nas inmediacións dun hotel herculino.
Non obstante, foi o Lugo quen se fixo cos servicios dun preparador que conta cunha ampla experiencia nunha terceira categoría na que leva dirixindo de forma ininterrompida desde 2015, primeiro ao Rácing de Santander e logo a Ponferradina, UCAM, Badaxoz e Sabadell.
Con el, que asinou por dúas tempadas, chega un equipo composto por Manuel Sánchez en calidade de segundo adestrador e Josellin Juncker como analista e asistente dun corpo técnico que agora debe comezar a traballar, en colaboración co tamén novo director deportivo David Peláez, nas novas fichaxes.
Polo de agora, o Lugo conta só con tres futbolistas de cara á tempada 2023/24 (Cuéllar, Carbó e Loureiro), xa que 19 dos homes que descenderon hai unhas semanas rematan contrato o próximo 30 de xuño.