O municipio de Baños de Molgas, na comarca de Allariz, acollerá o próximo domingo, 29 de outubro a duodécima edición da súa xa tradicional andaina solidaria. Nesta ocasión será a beneficio de Duchenne Parent Project España, unha asociación conformada por pais e nais de crianzas afectadas pola distrofia muscular de Duchenne e Becker.
Esta é unha rara doenza dexenerativa e incurábel que leva a que os músculos pouco a pouco se vaian debilitando, perdendo toda a súa funcionalidade e limitando enormemente a esperanza de vida das doentes.
A proba ofrece aos e ás participantes dous posíbeis percorridos, sendo o primeiro de 19 quilómetros de dificultade "media/alta", segundo estima a organización, que corre a cargo do Concello de Baños de Molgas. O outro será de 11 quilómetros e "nivel medio", co obxectivo de "adaptarse a todos os públicos".
Con respecto á saída, está programada ás 9 horas da mañá do antedito 29 de outubro na Estación de Ferrocarril, tamén lugar de chegada dun circuíto que, segundo estima o Concello, completarán arredor dun cento de participantes que deberán pagar 10 euros por persoa que irán destinados integramente á investigación da distrofia muscular de Duchenne e Becker.
