A oboísta Iria Folgado presentou onte na Coruña o seu primeiro disco, Ecos de Breogán, no que percorre o repertorio de música de cámara para óboe composto nas illas británicas no primeiro terzo do século XX por Benjamin Britten, Ralph Vaughan Williams, Arnold Bax e Elizabeth Maconchy, inspiradas polos costumes celtas, a cultura irlandesa e o mito de Breogán, xunto á creación contemporánea do galego Fernando Buíde del Real.
Segundo as lendarias tradicións irlandesas, Breogán foi un rei celta da Galiza que construíu unha alta torre en Brigantia, a actual cidade da Coruña. Dende o alto desta torre, o seu fillo Íth albiscou as illas británicas ás que partiu para alcanzar unha nova terra. Os costumes celtas e a cultura irlandesa cativaron ao compositor Arnold Bax, amante da poesía de William Butler Yeats, influencias que quedaron de manifesto no seu Quintet for Oboe and Strings a través das solemnes melodías iniciais xunto ao carácter festivo da xiga irlandesa que conforma o terceiro movemento da obra.
Ao comenzo dos anos trinta, o óboe viviu unha importante promoción no seu recoñecemento como instrumento solista no marco de dous concursos de composición de música de cámara: se o primeiro estivera impulsado polo industrial e melómano Walter Willson Cobbett, do que sairía vitorioso Benjamin Britten co súa Phantasy Quartet Op.2 para óboe, violín, viola e violonchelo; o segundo foi convocado por The Daily Telegraph e elixiu entre as súas partituras premiadas ao Quintet for Oboe and Strings de Elizabeth Maconchy. Ambas obras foron estreadas de forma inmediata por Léon Goossens e Helen Gaskell respectivamente.
Un dos retos desta xeración foi a ruptura coa estética imposta dende a Europa occidental e a procura dunha identidade musical propia, inquietude que levou a Ralph Vaughan Williams a realizar recolleitas na campiña británica gravando e transcribindo o seu folclore natal. Destas investigacións naceron os Six Studies in English Folksong compostos orixinalmente para cello e piano, sendo arranxados posteriormente para corno inglés e cuarteto de cordas por Robert Stanton.
Esta travesía sonora finaliza co galego Fernando Buide del Real, activo compositor da escena contemporánea internacional. En 2021, a partir dun Cuarteto de corda anterior en catro movementos, Buide del Real arranxou para Iria Folgado o Adagio para corno inglés para a súa interpretación no festival Música no Claustro na Catedral de Tui.
En Ecos de Breogán, Iria Folgado lidera unha formación de cámara integrada polas violinistas Raquel Areal e Sara Areal, xunto a viola de Héctor Cámara e o violonchelo de Iago Domínguez.
Iria Folgado
A oboísta galega Iria Folgado naceu en San Sadurniño (A Coruña) en 1996 e na actualidade é solista de corno inglés na Konzerthaus Orchester de Berlín, baixo a dirección artística de Joana Mallwitz, orquestra coa que ten interpretado destacados pasaxes solistas como o Concerto para piano de Maurice Ravel ou a Sinfonía fantástica de Hector Berlioz.
A súa formación musical iniciouse no Conservatorio Profesional de Música “Xan Viaño” de Ferrol e realizou cursos de especialización instrumental con Christina Dominik na Escola de Altos Estudos de Santiago de Compostela. En 2014 trasladouse a Alemaña co apoio da Deputación de A Coruña para realizar os seus estudos superiores con Dominik Wollenweber na Hochschule für Musik “Hanns Eisler”, ao que se sumaron as becas da Fundación Alexander von Humboldt e Excelencia Musical do Consorcio para a promoción da música de A Coruña.
Entre 2019 e 2021 foi academista na “Karajan Akademie” da prestixiosa Berliner Philharmoniker, momento que lle permitiu vivir grandes vivencias orquestrais baixo a batuta de Simon Rattle, Kirill Petrenko, Iván Fischer, Andris Nelsons ou Daniel Harding. A estas experiencias súmanse ás xiras internacionais coa propia Konzerthaus Orchester en Xapón, ou as recentes colaboracións en Mumbai coa Symphony Orchestra India baixo a batuta de Zubin Metha, ou percorrendo diferentes cidades suízas coa European Philharmonic of Europe dirixida por Charles Dutoit e a pianista solista Martha Argerich.
En paralelo a esta destacada traxectoria internacional, Iria Folgado mantén un compromiso firme coa súa terra natal colaborando coa Orquestra Sinfónica de Galiza, coa que participou na xira a Abu Dabi en 2016, así como a Orquestra 430 e a Orquestra de Cámara Galega, coas que ten ofrecido concertos como solista.
Actuou na primeira edición do Festival Internacional de Música Clásica de Vilagarcía de Arousa “clasclás” e entre 2021 e 2023 é artista residente do festival Música no Claustro, experiencia da que nace a gravación do disco Ecos de Breogán (Poliédrica 2023) co apoio das Axudas Creación INJUVE 2022-2023, ao que se suma o recente recoñecemento da Xunta de Galiza co Premio Talento Mozo Galicia 2023, na modalidade de cultura e creación, da Consellería de Política Social e Xuventude.