A mitoloxía feminista de Fillas de Cassandra

Antes de ter publicada ningunha canción, Fillas de Cassandra xa adquirira prestixio grazas a un directo que revelaba que había algo diferente no dúo formado por María Pérez e Sara Faro. As súas aparicións no Terraceo de Vigo ou no Festivala de Vilagarcía conseguiron crear unhas expectativas que se verán satisfeitas o vindeiro día 24 de febreiro, coa publicación do seu primeiro álbum de estudio, Acrópole. A proposta musical de Fillas de Cassandra herda as moitas lecturas que a música tradicional tivo nas últimas décadas, desde Xosé Lois Romero e Leilía até Baiuca e Tanxugueiras, mesturada con outras referencias que van desde a música barroca até Bad Gyal. Acrópole revisa varias personaxes da mitoloxía clásica desde unha óptica conscientemente feminista. A elección de Cassandra non é casual: á filla dos reis de Troia concedéuselle o don de predicir o futuro, mais sen que nunca ninguén crese nos seus vaticinios. "A calquera muller élle familiar ese cuestionamento constante da súa palabra", explican en conversa con Nós Diario. Nas cancións de Acrópole, Lisístrata transfórmase nunha apelación ao poder das mulleres para parar unha guerra ("se nós paramos, o mundo para / se o mundo para a guerra remata") e Dafne e Syrinx, fuxindo de Apolo e Pan, son dúas lesbianas que se escriben cartas. Fillas de Cassandra: "Na música galega estase tocando unha fibra que estaba adormecida pola época ditatorial" A mitoloxía actualizada "En realidade, o grande achado foi o nome, atopar Cassandra", relata Sara Faro. "A partir de aí, decatámonos de que a mitoloxía clásica era unha fonte inesgotábel de recursos para narrar o que queriamos contar nas nosas cancións. As historias de Dafne e Syrinx, por exemplo, non son senón historias de acoso semellantes ás que vive unha muller nunha discoteca. Ao revisar estes relatos, descubrimos que nos podiamos identificar facilmente con moitas desas vivencias -e violencias- que a mitoloxía pon ao descuberto. E dámoslle unha volta aos mitos para reflectir con eles unha lectura social, algo que a sociedade de hoxe poida recoñecer". En todo caso, o seu activismo non converte a súa música en panfleto ou en declaración: a lírica, a metáfora esquiva, un certo misterio, mantén a súa música nun rexistro poético que non contradí o compromiso. O seu primeiro concerto foi, nun acto da plataforma de Vigo Feminismo Unitario. O dúo non existía: chamáronas por separado e improvisaron un tema xuntas. E xurdiu a química, porque a partir de aí foron Fillas de Cassandra e comezaron a aparecer os temas propios e, sobre todo, as actuacións. "Foi moi sorprendente porque todo foi encadeándose dunha maneira moi espontánea: a un concerto acoden persoas con coñecidos nas organizacións doutros eventos e recoméndanos. E neses novos eventos, sucede o mesmo. E o bonito é que todas esas persoas tiñan que fiarse as unhas das outras, porque non había vídeos nin gravacións ás que remitirse". O boca a boca funcionou e, nalgún momento da historia, entre esa sucesión de actuacións que as dá a coñecer entre o público e que levanta expectativas, aparece Berto, que será o produtor do disco que sae agora á rúa. "Recibín unha mensaxe dicíndome que Berto precisaba teclista. Contactei con el e, xa traballando xuntos, ensineille un vídeo de Fillas de Cassandra. E debeu gustarlle porque inmediatamente insistiu en facerse cargo da produción do disco", lembra María Pérez. "Foi interesante porque ademais de gravar, aprendemos moito de produción e, ao final do proceso, xa nos atreviamos a facer suxestións para enriquecer as propostas do grupo", engade Sara Faro. As Fillas de Cassandra queren ir máis alá da música e ofrecerlle ao público que asista aos seus concertos un espectáculo integral: Faro estudou teatro e María, danza, o cal facilita esa proxección escénica da súa música. Antía Muíño: "A xente conecta coas revisións da música tradicional porque as recoñecen e emocionan" Visión escénica e ambición ante o futuro "Esa visión escénica apareceu desde o primeiro momento. Ambas temos moi claras unha serie de imaxes que acompañan e que contextualizan as cancións, como pequenos relatos visuais. A estrutura circular do disco tamén favorece que todo se poida integrar nunha narración que teña un sentido global. É como convidar ao público a facer unha viaxe a través das historias desas heroínas da mitoloxía". Acrópole verá a luz nas distintas plataformas dixitais o vindeiro venres 24, e a presentación do disco terá lugar o 4 de marzo na Sala Capitol de Santiago de Compostela, e as Fillas de Cassandra móstranse ambiciosas ante o reto. "Sempre dixemos que temos as miras altas, que queremos continuar facendo isto, transmitindo a nosa visión do mundo a través da música". Dúas artistas novas cunha completa formación multidisciplinar Tanto María Pérez (artisticamente María Soa) como Sara Faro comezaron os seus estudos musicais desde moi cativas. Faro compaxina a súa carreira musical cos estudos de dirección escénica e dramaturxia, dúas áreas que se retroalimentan mutuamente favorecendo o desenvolvemento dunha visión poética, sonora, estética e escénica propia. María Pérez compaxina os estudos musicais coa danza e a ximnasia acrobática, realiza un máster en Interpretación Solista en Madrid, e volve á Galiza para desenvolver o seu proxecto persoal MaríaSOA. En 2021, as dúas comezan co proxecto Fillas de Cassandra.