A banda musical Loita Amada —formada en 2022 polo ex cantante de Nao Jásper e a pandereteira Nébeda Piñeiro— anuncia o seu segundo álbum de estudio, Rematou o simulacro, marcando un paso significativo na súa evolución artística. O álbum ten como data de lanzamento oficial o vindeiro 3 de xaneiro do 2024.
Baixo a dirección do produtor vasco Kaki Arkarazo, o disco representa unha desviación marcada do anterior traballo e mergúllase nun son máis rockeiro e duro, explorando a amálgama de estilos que caracteriza a identidade musical da banda. Con nove pistas que abranguen desde o rock á música tradicional galega, o álbum promete ser unha manifestación sonora envolvente.
A banda presenta unha nova formación, coa destacada participación de músicos como María Prado, Xiana Naval, Iván Barreiro, Iván Bernárdez e Amós Varela. Nébeda Piñeiro, mantén un papel importante no proceso artístico, encargándose do deseño e ilustracións do disco físico.
Loita Amada ofrece unha oportunidade exclusiva para os seus seguidores: a posibilidade de adquirir unha copia física (limitada a 100 exemplares) do CD en formato de preorder a través da web de Afouta.
Como aperitivo ao lanzamento, o videoclip da canción "Unha revolución" será lanzado o 23 de decembro en todas as plataformas e nas redes sociais da banda. Unha oportuna introdución visual á esencia do álbum.
Loia Amada
Presentándose no 2022 co álbum Viva a Loita Amada Revolucionaria, Loita Amada estableceu unha presenza significativa na escena musical galega. Rematou o simulacro é a súa última declaración artística, prometendo unha exploración sonora profundamente reflexiva e enérxica.
Logo dunha longa e exitosa traxectoria na música galega, formando parte de bandas emblemáticas como Xenreira, A Matraka Perversa ou NAO, Jásper emprende unha nova etapa co seu novo proxecto musical, Loita Amada. Acompañado da talentosa pandereteira Nébeda Piñeiro, a banda naceu coa intención de revitalizar a canción protesta galega, levándoa a novos espazos e sonoridades. O proxecto reflicte a dualidade entre amor e loita, un concepto que expresan a través da súa música.
O proxecto Loita Amada tamén é un compromiso social. Con letras reivindicativas a nivel social e cultural,usa a súa música como vehículo para transmitir mensaxes de xustiza social, ben común e liberdade colectiva na patria galega. A súa convicción é que a música pode cambiar vidas e, por ende, contribuír á transformación do mundo.
