O festival lucense A Candeloria anuncia os horarios dos concertos. Máis dunha ducia de actuacións de grupos de rock, rap ou ska tocarán en Lugo os días 1 e 2 de marzo no Pazo de Ferias e Congresos.
O festival naceu en 2014 coa vontade de traer a Lugo unha programación musical de rock, rap, punk ou ska de primeiro nivel. Neste tempo consolidouse como un evento de referencia para os amantes do xénero. Para esta edición A Candeloria chega á cidade con dous días de música e as entradas case esgotadas.
Nesta edición, A Candeloria trae dúas noites de música e unha sesión vermú de Cantos de Taberna.
Un dos pratos fortes da edición e a despedida do grupo valenciano ZOO, que tocará o día 1 de marzo ás 22:55 horas. O seu paso por A Candeloria será a única parada na Galiza dunha banda que dende 2014 revolucionou a escena musical estatal.
Os fans dos tamén valencianos Mafalda terán a oportunidade de velos o sábado ás 19 horas. E non será a única despedida: o grupo valenciano Los Chikos del Maíz, vellos coñecidos do festival, anunciou recentemente unha "tregua indefinida" dende o próximo ano. Pasarán polo palco o sábado ás 23:30 horas.
Completan o cartel da sexta feira, 1 de marzo, Rebeliom do Inframundo, Familia Caamagno, Pigs Parlament, o grupo de rap Ira , Kamikazes e Jordi Pánico será o dj entre actuación e actuación.
O sábado 2 de marzo pasarán polo palco, xunto a Chikos del Maíz e Mafalda, os xa parte da familia do festival Soziedad Alcoholika, a banda de ska punk italiana Talco, o dúo feminino Tribade e Arrhythmia.
Tamén pasarán pola festa Me Fritos and The Gimme Cheetos e La Duendeneta animará entre actuacións.
Horarios completosSexta feira, 1 Kamikazes - 19 horas Familia Caamagno - 20.15 Ira - 21.25 ZOO - 22.55 Pigs Parlament - 00.55 Rebeliom do Inframundo - 02.15 Dj entre actuacións: Jordi Pánico
Sábado 2 de marzo Tribade - 17.45 Mafalda - 19.00 S.A - 20.35 Arrhythmia - 22.15 Los Chikos del Maíz - 23.30 Talco - 01.10 Me Fritos and The Gimme Cheetos - 02.30
Dj entre actuacións: La Duendeneta O sábado a música trasládase aos bares cos Cantos de TabernaA Candeloria completa a súa programación cos xa tradicionais Cantos de Taberna. Ata nove agrupacións pasarán por distintas tabernas da cidade lucense para animar o mediodía do sábado. O festival realízase co patrocinio da Área de Cultura, Turismo e promoción da Lingua do Concello de Lugo e a Área de Cultura da Deputación Provincial de Lugo, Mahou e Contravento. |