O que comezou hai uns meses como unha ilusión pode tornar na noite deste sábado en realidade. As Tanxugueiras, após superaren a súa semifinal coa segunda maior puntuación grazas ao televoto e o voto demoscópico, volveron interpretar 'Terra' no escenario do Festival de Benidorm.
“Non hai fronteiras”
— Eurovisión RTVE (@eurovision_tve) January 29, 2022
¡A cantar y bailar con Tanxugueiras!
#BenidormFest #ElFestivalQueQuieres
https://t.co/1P2GnrMaV8 pic.twitter.com/9LUNVzvu8z
Fixérono na segunda quenda, tras o rapeiro Rayden —con quen as pandeireteiras veñen de publicar o tema 'Averno'—. Séguenos Varry Brava, Chanel, Rigoberta Bandini, Xeinn, Gonzalo Hermida e Blanca Paloma.
Segundo unha enquisa publicada minutos antes de que principiase a final por Electomanía, as Tanxugueiras serían as favoritas de 46,4% das persoas enquisadas en todo o Estado, con máis de dez puntos de vantaxe sobre a seguinte artista, Rigoberta Bandini (34,2%). Chanel, con 11,3%, ficaría terceira.
Así, segundo esta mesma sondaxe, as Tanxugueiras gañarían na Galiza, Asturies, Cantabria, Nafarroa, València, Alacant, Teruel, Granada, Tarragona, Tenerife, León, Zamora, Salamanca, Burgos, Huelva, Badaxoz e A Rioxa.
Por outra parte, o portal especializado no certame Eurovision World vén de publicar unha sondaxe, na que participaron máis de 28.000 persoas de todo o continente europeo, que eleva as galegas á primeira posición con 47% dos votos, cunha ampla vantaxe sobre a seguinte mellor valorada, Rigoberta Bandini, con 17%, e Chanel, con 11%.
Como funciona o sistema de voto
O sistema de voto é o mesmo que xa se utilizara nas semifinais. Así, 50% da puntuación corresponde ao xurado profesional, composto polas xuízas españolas Natalia Calderón, Miryam Benedited e Estefanía García e os internacionais Marvin Dietmann e Félix Bergsson. A outra metade divídese a partes iguais entre o televoto e o voto demoscópico.
Cómpre lembrar que as Tanxugueiras obtiveron na semifinal 38 puntos do xurado —ficando en quinta posición—, 25 do demoscópico —segundas— e 30 do televoto —a maior puntuación—.
Cada un dos membros do xurado outorgará na final 12, 10, 8, 7, 6, 5, 4 e 2 puntos, respectivamente. Aliás, a través do televoto concédense 30, 25, 20, 18, 15, 12 ,10 e 5 puntos, os mesmos que no demoscópico.