As temperaturas de novembro fan de 2023 o ano máis cálido

Logo de que a pasada segunda feira Meteogaliza dera a coñecer que o outono de 2023 foi o máis cálido e húmido da serie histórica –cunha temperatura media de 16,4ºC e un acumulado de precipitacións de 797 l/m2– o Servizo de Cambio Climático de Copernicus (C3S) confirmou esta cuarta feira que "as extraordinarias temperaturas mundiais" de novembro converten 2023 no ano máis cálido desde que existen rexistros.

Segundo o boletín mensual que publica o C3S, novembro de 2023 tivo unha temperatura media do aire en superficie de 14,22ºC, 0,85ºC por riba da media de 1991-2020 para ese mes, e 0,32ºC por riba da temperatura de novembro de 2020, que fora o mes de novembro máis cálido até a data.