O Movistar de Carlos Canal tamén correrá a Volta Ciclista á Galiza

A terceira edición da Volta Ciclista profesional á Galiza, tamén coñecida como O Gran Camiño, volverá contar coa presenza do Movistar Team, o único equipo do Estado español no circuíto UCI World Tour, a máxima categoría planetaria. Nesta tempada, a súa número 45 dentro do pelotón, non só mantén o bloque de 2023, senón que incorporou ás súas filas Carlos Canal, o corredor galego máis importante da actualidade. O Movistar Team forma parte importante da historia do Gran Camiño, xa que un dos seus ciclistas, Alejandro Valverde, foi quen rematou no primeiro posto da clasificación xeral na edición de 2022. Este ano pasado, logo da retirada do murciano, o seu xefe de filas foi o luso Rubén Guerreiro, que logrou facerse con dous segundos postos de etapa e o terceiro na xeral.