Campo da Feira imponse e roza o título na Conferencia Noroeste da Liga Atlántica de Billarda

Palanadoras e palanadores de toda a Galiza xuntáronse na praia de Bastiagueiro (Oleiros) para disputar a xornada número 13 da Conferencia Noroeste da Liga Atlántica de Billarda. Alí, e sobre unha superficie pouco habitual no torneo como é a area, impúxose Campo da Feira de Paiosaco após sumar 69 puntos, que representaron nove de vantaxe sobre Cochiqueiros de Cerceda (60), ampliando, ao mesmo tempo, até os 30 a distancia que separa ambas escuadras no máis alto da clasificación colectiva. No plano individual, Basilio (Billardeiros Musicais de Ribadeo) comandou o seu equipo até o terceiro posto do podio da xornada grazas aos seus 19 puntos, mérito que tamén logrou na categoría feminina a súa compañeira Geni, que rematou por diante de Dori, tamén de Billardeiros Musicais.