Medio cento de concellos participan este ano no programa 'Móllate polos ríos' da man de Adega

A XVI Limpeza Simultánea 'Móllate polos ríos', organizada polo Proxecto Ríos de Adega, decorrerá este ano de forma simultánea en 52 municipios de todo o país e nela participarán máis de 60 asociacións, concellos, colectivos ecoloxistas, centros de ensino e outras entidades, algunhas delas novas que se suman por primeira vez nesta nova edición. Será este domingo, día 24, e mobilizará "unha gran cantidade de voluntarios e voluntarias que se mollarán polos ríos destes 52 concellos para deixalos libres de lixo", salientan desde a organización ecoloxista. Pola súa parte, os centros de ensino están convocados a realizaren esta mesma actividade dous días antes, na sexta feira. Todo o voluntariado será agasallado cunhas camisolas conmemorativas.