Contaba un exiliado republicano español que o despoxaran da súa nacionalidade unha vez chegado á Arxentina, pasando de ser español a ser galego. É de todos sabido, incluso dos máis castizos centralistas, que en países como Cuba, Arxentina, Uruguai ou Venezuela non existen españois, son todos galegos ou vascos.
A emigración vasca á Arxentina, Uruguai ou a Venezuela, principalmente a posterior á guerra civil, antepuxo a súa nacionalidade vasca, loxicamente, antes que a pertenza legal ao Estado español. Os exiliados vascos en Venezuela entraron co pasaporte do Goberno Vasco, Igarobide, e moitos deles morreron e voltaron a Euskadi sen ter nunca un pasaporte español, pois o fixeron xa como venezuelanos.
Decenas de miles de galegos chegaron a América sen ter coñecido nin o territorio español nin a lingua de Castela e tendo coma única identidade xeográfica e cultural o seu país: Galiza.
O recoñecemento identitario destes chegados a América vén da súa autoidentificación como galegos e non como españois, autoidentificación que nunca faría un aragonés, un andaluz, un murciano ou un leonés. Por esa autoidentificación nestes sitios de América identifícanse os galegos polo que son, gallegos.
O recoñecemento identitario destes chegados a América vén da súa autoidentificación como galegos e non como españois
![Publicidade 195255]()
Por iso non deixa de ser un acerto, imperceptíbel para moitos, que os narcotraficantes da serie Fariña sexan definidos identitariamente polo que son, galegos, por parte dos narcos panameños e colombianos, dous países nos cales a emigración galega é anecdótica e onde, polo tanto, non están afeitos a chamar gallego a todos os españois. Esta identificación acertada e axeitada vén dos narcos da ría de Arousa cando se presentaban eles mesmos ante os narcos panameños e colombianos.
Renxe que na actualidade os descendentes de galegos en América, fillos e netos, se definan como españois, algo que non fixeron os seus devanceiros, dos que adquiriron o dereito a unha cidadanía como a española, e afirmen que marchan vivir a España cando marchan vivir á Coruña ou a Vigo.
