sábado 16/10/21

Sobe o desemprego interanual en 18.999 persoas, das que 57,1% son mulleres

Febreiro confirma os malos datos de desemprego e o aumento deste entre as mulleres e a mocidade. Ademais, seguen a medrar os expedientes de regulación temporal de emprego (ERTE). Desde a CIG, CCOO e UXT lembran a necesidade de mobilizarse, implementar un plan de reconstrución económica e derrogar as reformas laborais.
As mulleres son as máis prexudicadas. Entre elas as que teñen unha peor situación son as máis mozas (Arxina)
As mulleres son as máis prexudicadas. Entre elas as que teñen unha peor situación son as máis mozas (Arxina)

Os datos do desemprego rexistrado, publicados onte polo Ministerio de Traballo e Economía Social, apuntan a unha caída de 756 persoas (-0,41%), unha baixada menor do habitual, deixando a cifra de persoas sen traballo na Galiza en 185.228, 18.999 máis (+11,43%) que en febreiro de 2020. A afiliación na media mensual sobe en 1.692 persoas (0,17%), cifra moi similar á dos últimos días do mes (+1.213 persoas). 

Análise por sexos e contratación

As cifras indican que o paro medra entre as mulleres (503 desempregadas máis), mentres que se reduce entre os homes (-1.259 desempregados menos). As mulleres supoñen xa un 57,1% do desemprego galego, medio punto máis que no mes de xaneiro. O desemprego redúcese menos entre as persoas máis mozas (-135 persoas) que entre as maiores (-621 desempregadas). Por sectores, o desemprego baixa no primario (-193) e na construción (-449), medrando na industria (+158) e nos servizos (+266).

En relación á contratación, xaneiro deixou na Galiza 49.174 contratos, dos cales 43.541 (88,54%) foron temporais. En termos mensuais, a contratación cae nun 18,7%, mentres que nos anuais é dun 32,1%. 

Aumentan os ERTE

O mes de febreiro rematou con 46.665 persoas cun expediente de regulación temporal de emprego (ERTE), o que supón 15.357 máis que o último día de xaneiro, un incremento de case 50%, segundo os datos que publicou nesta terza feira o Ministerio de Inclusión, Seguridade Social e Migracións. Deles, 19.012 son homes e 27.653 son mulleres. Se se toma como referencia a cifra media, e non a do último día do mes, deixa 47.207 persoas en ERTE na Galiza en febreiro, neste caso 17.468 persoas máis que a media de xaneiro (29.739), cunha alza media de 58,7%. 

Mobilizacións e derrogar das reformas

"A maior precariedade e temporalidade que padecían as mulleres propiciou que foran as primeiras en ser despedidas ao inicio da pandemia e o feito de que as maiores perdas de emprego se deran no sector servizos, e nomeadamente nas actividades máis feminizadas, como a hostalería, empeorou a situación", analizan desde a CIG. Diante desta situación o secretario confederal de Emprego da central sindical nacionalista, Fran Cartelle, entende que "é necesario mobilizarse" e advirte que "nestes datos non están computadas as traballadoras que continúan en ERTE, que poderían pasar a ser ERE despois". Por iso reitera un chamamento á folga de mulleres e ás mobilizacións convocadas para o 8 de marzo.

Desde CCOO apuntan que estas cifras revelan unha "importante crise" do mercado laboral galego que, "non se debe exclusivamente á Covid-19". Segundo a secretaria de Emprego deste sindicato, Maica Bouza, "a situación sería aínda máis grave se non dispuxésemos dese escudo para o mantemento do emprego que son os ERTE". Para CCOO, a Xunta "xa vai tarde" á hora de implementar un plan de reconstrución económica e social, consensuado coas forzas políticas e cos axentes sociais para estimular a actividade e o emprego. Ás portas do 8-M, denuncia que as mulleres seguen tendo unha "peor situación" que os homes no mercado laboral. 

Para UXT, os datos de desemprego "reflicten que a pandemia está a agravar en xeral a situación económica e laboral de todo o país pero, no caso das mulleres, vense aínda máis prexudicadas". Nun comunicado sinalan que "é necesario acelerar o proceso de vacinación e seguir mantendo os ERTE". Para este sindicato "a mellor noticia para o 8 de marzo, Día internacional da Muller, sería que o Goberno español cumpra os seus compromisos e derrogue a reforma laboral de 2012" asegurando que "a recuperación non pode asentarse na precariedade".

comentarios