Representantes da Confederación Intersindical Galega (CIG); Comisións Obreiras (CC.OO.); e a Unión Xeral de Traballadores (UXT); anunciaron esta segunda feira a convocatoria desde o 16 de outubro dunha folga indefinida, "de non cambiar a patronal a súa postura na mesa de negociación do convenio de limpeza de edificios e locais da provincia de Lugo".
"Transcorreron case tres meses desde a reunión coa patronal (o 27 de xuño) e non recibimos resposta. Isto demostra un absoluto desprezo cara ao sector da limpeza", denunciou respecto diso a representante de CIG-Servizos en Lugo, Asunción Castiñeira, antes de informar tamén da convocatoria dunha marcha (esta cuarta feira, ás 11.30 horas) "como paso previo ao comezo da folga.
Castiñeira acusou directamente a patronal, a Asociación Profesional de Empresas de Limpeza (Aspel) de "dilatar no tempo a negociación do convenio" e de deixar as traballadoras e os traballadores do sector (uns 1.800 profesionais, segundo os cálculos dos sindicatos) "na máis absoluta miseria".
Na mesma liña posicionouse o responsábel do sector de limpeza de Comisións Obreiras, José Manuel Brea, quen subliñou que a principal pretensión da plataforma de negociación é "non quedar ningún ano por baixo do salario mínimo interprofesional".
"Respecto e dignidade"
"Esta folga ten que ser unha chamada ao respecto e a dignidade para o sector da limpeza", dixo, para acto seguido proclamar: "Ás traballadoras non queda máis saída que loitar por ter uns salarios dignos e un convenio xusto".
"Detrás dos números hai persoas", lembrou, pola súa parte, o responsábel do sector de limpeza de UXT, Óscar González Boyero, quen lembrou que o sector da limpeza está "altamente feminizado" e que non sempre dispón "das mesmas ferramentas que outros colectivos" para concorrer á folga.
Boyero concluíu a súa intervención manifestando que unha das principais liñas vermellas da plataforma na negociación é que se respecte "a antigüidade das traballadoras".
