O declive da industria galega: menos empresas e menos emprego de calidade

O panorama actual do sector industrial galego debuxa unha situación complexa. Desde un punto de vista sectorial, a industria ocupa na Galiza o terceiro lugar en presenza empresarial, segundo a última enquisa estatística de Empresas Inscritas na Seguridade Social publicada este ano polo Ministerio Traballo e Economía Social e relativa a 2022. Situaríase con 8,6% por detrás de servizos (74%) e da construción (10,4%). Os datos dese mesmo ano do Ministerio de Industria, Comercio e Turismo indican que no sector industrial hai un total de 11.724 empresas, das que a maior parte, 9.957, están no ámbito das microempresas (de cero a 9 persoas traballando); seguidas das empresas pequenas (de 10 a 49) con 1.421; as medianas (de 50 a 249) con 290; e en menor medida das grandes (máis de 250) con 56. Ademais, en 2022, o sector industrial reduciu o número de empresas en -0,3% fronte ao aumento no conxunto do Estado español que foi de 0,5%. No inicio de 2024, concretamente en xaneiro, a cifra de negocios da industria galega caeu 3% en relación ao mesmo mes de 2023, segundo os datos do Instituto Nacional de Estatística (INE), mentres que a nivel estatal aumentou 1,6%. O ano anterior, en relación a 2022, xa caera 2,9%, un descenso máis acusado que o que tivo a media do Estado español (-1,9%). O sector industrial da CIG clama contra a precariedade e en demanda de traballo digno Por último, a debilidade da industria galega visibilízase na destrución do emprego, que pasou de ocupar 210.200 persoas en decembro de 2008 a 174.700 no mesmo mes de 2023, segundo o último informe da Enquisa da Poboación Activa (EPA). Máis precariedade Na xornada de esta quinta feira, a CIG realizou en Compostela unha asemblea, seguida dunha manifestación polas rúas da capital galega, con delegadas e delegados neste sector na que analizaron a súa situación desde o punto de vista sindical. O secretario nacional da CIG-Industria, Xoán Xosé Bouzas Aboi, explicou a Nós Diario que constataron “un aumento da precariedade despois das reformas laborais do Partido Popular e as últimas de hai dous anos”. Neste sentido, sinalou que “malia o cambio de nome nos contratos, segue habendo un abuso fraudulento dos períodos de proba como modalidade de contratación, un reforzo das empresas de traballo temporal”. Alcoa e As Pontes A situación de Alcoa, na Mariña, e o futuro que seguirá tras o desmantelamento da central térmica das Pontes, no Eume, foron algúns dos temas que centraron a xuntanza da central nacionalista polo número de empregos en xogo. “Estamos a falar de milleiros de postos de traballo e vemos como, no caso das Pontes, as diferentes administracións pasan de todo e non hai ningunha comunicación”, sinalou Bouzas Aboi. Na propia asemblea escoitouse a intervención do auxiliar de Endesa e traballador no proceso de desmantelamento da central térmica, Celso Barros, quen denunciou que “desde novembro non se reúne a mesa para o impulso económico da comarca”. O comité de Alcoa pide datos sobre o reinicio de cubas e critica o "incumprimento" do forno de ánodos Alcoa prevé en xuño ofertas para vender a fábrica No caso de Alcoa en San Cibrao (Cervo, A Mariña), o membro da sección sindical nacionalista, Xosé Manuel Peña, evidenciou esta quinta feira que “non hai unha proposta concreta para unha solución factíbel” e reclamou que as administracións estuden todas as accións legais e institucionais para que se garanta o cumprimento dos compromisos por parte da multinacional estadounidense. Coincidindo coa xornada de protesta da CIG, esta quinta feira tamén tiña lugar unha reunión da mesa de seguimento de Alcoa en Madrid. A empresa comunicou nela que iniciaron os contactos con potenciais compradores, polo que cren que a mediados de maio haberá ofertas non vinculantes, as cales serán vinculantes en xuño. Así, a multinacional presentoulles unha situación financeira a cinco anos con liñas de actuación para garantir a viabilidade. A Xunta e o Goberno español expresaron o seu “compromiso” de “axudar” na venda mentres que desde o comité de empresa rexeitan o plan por entender que “non presenta ningunha garantía” con 600 millóns en perdas os primeiros anos. As tecnolóxicas O responsábel sectorial da central nacionalista tamén reclamou a implantación de industrias tecnolóxicas e de fabricación de compoñentes de equipos para a industria de enerxías renovábeis, denunciando que as que había fecharon ou deslocalizáronse, o que supuxo "unha perda de máis de 5.500 empregos no sector eólico". Neste sentido, cuestionou o emprego que se anuncia cos proxectos de implantación de novos eólicos e lembrou que as 45 primeiras empresas eólicas na Galiza “só dan emprego a 37 persoas” ou no caso da Terra Chá, "un concello con 20 parques eólicos e 381 aeroxeradores, só empregou até hoxe catro persoas”. Respecto da eólica mariña defendeu que sexan excluídos os territorios que no ano anterior xa cumpriran os obxectivos de produción de enerxía eléctrica con renovábeis e exixiu que todos os proxectos de implantación de actividades enerxéticas teñan proxectos de desenvolvemento económico e plans industriais asociados, creadores de emprego neto real, "sen posibilidade de segregalos da actividade de produción de enerxía, aumentando o retorno económico e social as persoas e territorios afectados". Alcoa anuncia contactos para a venda da factoría: as centrais sindicais requiren máis información Ademais, afirmou que a Xunta “ten que facer unha política industrial, enerxética e social, non estar ao servizo das grandes eléctricas, pondo en perigo sectores sociais que proporcionan alimentos básicos á poboación” e apostou pola creación "dun novo sistema público de fixación de prezos da electricidade". Por último, adiantou que desde a federación "loitarán pola implantación de coeficientes redutores para sectores nos que o persoal padeza especial desgaste na súa saúde" e anunciou que darán “a batalla” polo dereito á xubilación parcial. Preocupación polo futuro de Stellantis con 7.000 empregos e 150 auxiliares Unha das preocupacións que se expresaron esta quinta feira na asemblea de delegadas e delegados do sector da CIG foi o futuro dunha das seccións máis importantes do sector da industria galega polo número de empregos que están en xogo: a automoción. A planta de Setellantis en Vigo dá emprego a unhas 7.000 persoas, ademais contar cunhas 150 empresas auxiliares do sur da Galiza, especializadas en fabricar pezas para vehículos da antiga PSA-Citroën, que dependen dela. Semellante volume implica un seguimento dos pasos que se están a dar para a súa continuidade. Na asemblea de esta quinta feira, a responsábel nacional de automoción da CIG, María Xosé García, amosou a súa inquietude no panorama actual. "Desde 2008 non se instalou ningunha empresa nova, nin a fabrica chinesa anunciada para Vigo, nin a tan cacarexada planta de baterías, nin a de semicondutores". Diante disto, denunciou que si tiveron lugar deslocalizacións das empresas que había, e alertou da prohibición, a partir de 2030 de fabricar coches de combustión, "unha circunstancia "ante a que Stellantis aínda non aclarou cales son os seus proxectos de futuro". Bouzas Aboi lembrou a Nós Diario que "desde que se falou do tema da descarbonización as compañías relacionadas coa automoción decidíronse por outros lugares para instalarse, como é o caso de Portugal ou o norte de África". Neste sentido, criticou que se falou no seu momento de proxectos "como o dunha planta de baterías ou outro de semicondutores que ao final quedaron en nada ante a pasividade da Xunta da Galiza".