mércores 15.07.2020

Denuncian Alu Ibérica diante da Inspección de Traballo

O comité de empresa demanda que se actúe na empresa por presuntas irregularidades.
Rolda de prensa do comité diante da Inspección de Traballo (Nós Diario)
Rolda de prensa do comité diante da Inspección de Traballo (Nós Diario)

O comité de empresa de Alu Ibérica presentou onte unha denuncia na Inspección de Traballo da Galiza por presuntas "irregularidades" cometidas polo novo propietario nos últimos meses. O presidente do comité, Juan Carlos López Corbacho, explica a Nós Diario que desde Alcoa "elixiron a Parter como inversor cando sempre dicían que buscarían un inversor serio".

No escrito presentado en Inspección figura a situación que viven traballadoras e traballadores desta factoría "desde que se asinou ese acordo con Parter o día 31 de xullo". O representante do cadro de persoal sinala que houbo unha xestión da empresa "para causar un prexuízo a propósito". Pon como exemplo que se esgotan os inventarios, falta de pagos a provedores, problemas con clientes e non saber o destino que leva a produción actual.

"Non hai transparencia", denuncia. A intención do comité é que se faga un informe destes feitos por parte da Inspección. "Que investigue e interrogue" para logo dar traslado do resultado ás autoridades de Traballo.  

Problemas para realizar asembleas informativas

Onte tamén as traballadoras e traballadores tiveron problemas para realizar a súa asemblea semanal no cambio de quenda. "A única maneira que temos de ver as compañeiras e os compañeiros coa actual situación provocada pola COVID-19 é nese momento".

Membros de seguridade impediron o paso das persoas representantes sindicais e tivo que intervir a propia Subdelegación do Goberno e a policía. "Inspección xa ten tamén informe deste incidente que consideramos grave", explica o responsábel do comité de empresa.

Anuncian varias mobilizacións para os vindeiros días. A primeira será o 28 de maio e consistirá nunha marcha en coches que sairá da propia fábrica ás 11.30 horas para percorrer a cidade. 

comentarios