O comité de empresa de Alu Ibérica na Coruña solicitou ao Goberno estatal a "intervención" da fábrica para garantir a execución dos investimentos, despois de que o pasado 15 de abril "sorprendentemente", denunciaron nun comunicado, trasladáraselles que a xestión desta planta e a de Avilés pasaba a estar controlada polo grupo industrial Riesgo, despois de adquirir 74,9% de Parter Capital Group.
O comité cualifica de "moi grave" a situación xerada por esta venda. Consideran que "a única solución" é "a intervención" das dúas plantas "por parte do Estado para ser xestionada polo SEPI ou outro organismo e garantindo así a execución dos investimentos comprometidos” por Alcoa e garantir un "proxecto industrial".
Na súa declaración, tamén denuncian a postura da alcaldesa da Coruña, Inés Rey, da que afirman que "nin sequera se molestou en preguntar" pola súa situación a pesar de ser "da pouca industria que queda na cidade".
Esta denuncia esténdese á Xunta, da que sosteñen que "só aparece para criticar o Goberno estatal", engade o comité.
O comité, que reivindica o carácter "estratéxico" desta industria, tamén critica que non se lle informou da venda das plantas e que non se lle facilitase documentación "ningunha", feito que, segundo o que explican, puxeron en coñecemento da Inspección de Traballo.
