A CIG-Ensino puxo en marcha unha campaña de sinaturas pola igualdade retributiva do profesorado de Formación Profesional (FP) para dar resposta aos colectivos que "quedan descolgados" do proceso de integración no corpo de Profesorado de Educación Secundaria.
Segundo trasladou a central nacionalista, a iniciativa busca ter presente a todos os colectivos.
Asegura que "a Consellaría de Educación relega coas súas declaracións na Mesa Sectorial", achegando "propostas de solución legalmente factíbeis e que só dependen da vontade política".
Tamén salienta que a recollida de firmas é unha chamada para "actuar con unidade dentro do profesorado de FP" e a "apoiar masivamente que teñan as mesmas retribucións e os mesmos dereitos unha vez que se aplique a integración no corpo de Profesorado de Ensino Secundario (PES) aberto coa convocatoria publicada no Diario Oficial da Galiza (DOG) para aqueles que reúnen os requisitos de titulación fixados polo Ministerio".
As demandas
Así, a CIG-Ensino centra as reivindicacións en diferentes asuntos: negociar un complemento de equiparación para o profesorado que queda para extinguir no corpo de Profesores Técnicos de FP; o compromiso de pago con carácter retroactivo desde xaneiro de 2021 para as persoas que traballasen como docentes interinas na data da entrada en vigor da Lomloe; e, para o funcionariado que aprobou as oposicións en 2021, un total de 603 persoas, modificar o artigo 16.3 da orde de integración e recoñecer os efectos desde o inicio da fase de prácticas.
Alén diso, a CIG-Ensino pide que se garantan os dereitos de profesorado especialista e de quen non ten titulación para as oposicións.
