A liña de axudas que a Xunta da Galiza vén de aprobar para os traballadores e traballadoras por conta propia baixo o título 'Impacto autónomo' conta cun investimento de 30 millóns de euros para beneficiar arredor de 30.000 profesionais da Galiza, tendo en conta que a contía das subvencións oscila entre os 800 e os 1.500 euros.
Porén, a maior parte das persoas que están a cursar as súas respectivas solicitudes quedarán sen axuda —perto de 100.000 nestes momentos— , e só a recibirán as máis madrugadoras, dado que se conceden por orde de recepción, sen importar calquera outro criterio.
"En aplicación dos principios de eficiencia na asignación e utilización dos recursos públicos establecidos na Lei de subvencións da Galiza, e sendo unha convocatoria de subvencións en concorrencia non competitiva, a orde de prelación para a resolución das solicitudes virá determinada pola data en que se presentase a documentación completa requirida nestas bases reguladoras", recolle o Diario Oficial da Galiza (DOG).
O prazo abriu esta mesma segunda feira e fechará o 9 de febreiro, se ben para entón non quedará 'pastel' que repartir. Máis unha vez, o portal habilitado pola Xunta para este tipo de trámites colapsou e deixou autónomos e autónomas á cola con milleiros de persoas por diante e un tempo de espera de varias horas.
O decurso deste procedemento e a ausencia de criterios claros para a concesión desta liña de subvencións está a suscitar numerosas críticas por parte deste colectivo.
Ser pring... autónomo neste país mola moito. A Xunta vén de aprobar unha axudiña de 1200-1500 para case todos.
— Non teño Mastodon (aínda) 🌰 🐷 (@dosiveiga) January 9, 2023
A realidade: pic.twitter.com/6ojjuj0WNm
Así estamos, máis despóis o goberno da @Xunta venderá como éxito este colapso derivado da presentación de solicitudes de axudas ás persoas autónomas, nas que os criterios de adxudicación non son obxectivos senón coma no Oeste, a ver quen dispara (aquí, presenta) primeiro. #noxo pic.twitter.com/udxtDDErEw
— Rocío da Igrexa (@RociGz) January 9, 2023
o método da @Xunta de dar axudas sen ningunha caste de criterio nin control e baixo o método de "mátense vostedes mesmos" éche a bomba. pic.twitter.com/VPHbQdgyuo
— rocio castro (@rociocastrot) January 9, 2023