A Xunta valora contratar persoal sen titulación nas residencias públicas

A Consellaría de Política Social valorará contratar persoal sen titulación —sempre que teña experiencia no coidado de persoas dependentes— nas residencias públicas para cubrir as baixas do persoal derivadas do coronavirus, no caso de o precisaren.

Actualmente, segundo os datos achegados á axencia Europa Press pola Administración galega, hai 68 traballadores e traballadoras de baixa laboral como consecuencia da infección por SARS-CoV-2 de 3.200 persoas que compoñen o persoal, o que significa que está afectado 2,1% do cadro de persoal.

Esta medida foi exposta no Consello Interterritorial e a Galiza mostrouse de acordo. Na primeira semana de xaneiro de 2022, había 8.367 traballadores de residencias de maiores contaxiados coa Covid-19 no conxunto do Estado, segundo a última actualización de datos do Instituto de Maiores e Servizos Sociais (Imserso), publicados a pasada sexta feira, un informe que por vez primeira inclúe estes datos.

En previsión desta situación e ante a petición das patronais de Dependencia, o Goberno estatal autorizou o pasado 30 de decembro de 2021 a contratación de persoal sen titulación, a través dunha resolución da secretaría de Estado de Dereitos Sociais froito do acordo do Consello Territorial de Servizos Sociais e do Sistema para a Autonomía e Atención á Dependencia (SAAD). En concreto, modifícase o criterio terceiro do Acordo do 27 de novembro de 2008, do Consello Territorial de Servizos Sociais e do Sistema para a Autonomía e Atención á Dependencia, sobre criterios comúns de acreditación para garantir a calidade dos centros e servizos do SAAD.

Unha medida "excepcional"

Así, estabelécese que, "de forma excepcional e mentres dure a situación de pandemia derivada da Covid-19", poderán desempeñar funcións nos diferentes servizos do SAAD persoas que carezan de titulación. Aínda que, sinala, preferentemente deberán ter "experiencia en coidado e atención de persoas dependentes, debendo as entidades prestadoras de servizos garantir a supervisión e formación práctica no posto de traballo".

Ademais, para poder aplicar dita excepcionalidade deberán darse dúas condicións de forma simultánea: que se acredite polo servizo público de emprego correspondente a non existencia de demandantes de emprego coas titulacións específicas requiridas; e que a provincia na que se sitúe o centro se atope nunha situación de nivel de alerta 3 por coronavirus.

Opinións do sector

Sexa como for, corresponde ás administracións públicas competentes en Servizos Sociais ditar as resolucións, disposicións e instrucións interpretativas que, no seu caso, sexan necesarias para a aplicación deste réxime provisional excepcional. A presidenta do Círculo Empresarial de Atención ás Persoas (CEAPs), Cinta Pascual, explicou a Europa Press que xa alertaron a todos os gobernos territoriais e ao do Estado de que "a situación que se está vivindo co persoal é realmente moi preocupante".

Desde a Asociación de Empresas de Servizos para a Dependencia (Aeste), explican que enviaron unha petición a todas as consellerías para que trasladasen á normativa autonómica esa autorización.

Pola súa parte, a Asociación Galega para a Defensa da Sanidade Pública considerou "inaceptábel" que, a pesar da experiencia durante a pandemia, as persoas maiores sigan "maioritariamente" en mans de multinacionais, en referencia aos gromos rexistrados en residencias privadas galegas e para as que a asociación de familiares pediron intervención da Xunta.

Tamén para este colectivo é preciso "reintegralas no sistema público" de forma "urxente e a súa "coordinación" coa Atención Primaria para "garantir a promoción, prevención e tratamento das persoas maiores" nesta e en futuras epidemias.