—Como se puxo en contacto con vostede a empresa para alimpeza dos pellets?
É unha empresa da Xunta [Seaga] que se dedica a traballos agrícolas. Puxéronse en contacto comigo para saber se estaba interesado en traballar con eles durante a campaña de recollida de pellets nas praias e foi entón cando comecei.
—Como está a ser o traballo nas praias?
O procedemento é o seguinte: recibimos información de Seaga cada mañá, eles dinnos a que praias ir e o que facer en cada unha delas. Unha vez nas praias a realidade é que é todo unha pantomima. Os primeiros días estivemos nunha praia en Moaña e a única instrución que nos daban era “que se vos vexa”. Non recollemos nada.
O que está claro é que desde a empresa non teñen claro nin como proceder aínda a día de hoxe. De feito, a pantomima é tal que unha vez mandáronnos limpar á praia fluvial do Lérez... Para que se vexa como está o tema. Estivemos noutras praias de diferentes municipios pero o problema principal é que desde a empresa non saben nin como facer para proceder coa limpeza: hai quen nos di que recollamos de un en un os pellets mentres que outros nos din que recollamos todos os plásticos que vexamos, non só pellets.
—Comentaba que o que lle interesa á empresa e “que se vos vexa”, non si?
Si, sobre todo ao principio insistíasenos moito en que o importante era que a xente nos vise cos chalecos nas praias. Mesmo nos mandaban a praias de ría, onde hai moitos menos pellets... A coordinación é nula.
—Sobre as condicións en que están a traballar. A empresa proporciónalles material para limpar?
Un caldeiro. Iso é todo, nada máis porque estabamos recollendo de un en un. Agora que cambiou un pouco o sistema xa estamos levando algo máis de material.
—Como ve vostede a situación nas praias? Evoluciona favorabelmente?
Como estes días estivemos en praias de ría en que case non hai pellets non podo dicir con exactitude. Onde si que hai moitos pellets é nas praias de mar aberto e aí case non estivemos limpando nada polo que non podo dar unha resposta ao respecto. O problema principal é que como son tan pequenos, eu creo que vai haber pellets nas praias galegas durante anos.