A sanidade galega, solidaria co persoal sanitario e de axuda humanitaria de Palestina
"Hospitais, centros de saúde e ambulancias non poden ser obxectivos militares", clamaron a un tempo profesionais da sanidade galega nun acto solidario que se repetiu na entrada principal do Hospital Universitario Arquitecto Marcide de Ferrol, no Universitario da Coruña (Chuac), no Hospital Clínico de Santiago, no Lucus Augusti de Lugo, no Hospital Universitario de Ourense, no Hospital de Montecelo de Pontevedra e no Álvaro Cunqueiro de Vigo.
Ás 12 do mediodía, persoal sanitario concentrouse convocado pola CIG-Saúde co apoio da Asociación Galiaco-Árabe Jenin, Mar de Lumes e Galiza por Palestina para expresar a súa solidariedade con palestina, nomeadamente cos profesionais da saúde e de axuda humanitaria que atenden a diario a poboación de Gaza e Cisxordania.
"As traballadoras e traballadores da sanidade galega queremos dicir que o persoal da sanidade Palestina non está só" fronte aos ataques estratéxicos de Israel, "ataques sistemáticos" contra hospitais, clínicas, ambulancias e escolas médicas, que nos últimos meses tamén castigaron persoal e pacientes vítimas da "barbarie e o xenocidio".
A sanidade galega situouse esta cuarta deira, 24 de abril, publicamente ao carón de Palestina, na maioría dos centros hospitalarios coa presenza espontánea de persoas usuarias da sanidade pública que decidiron sumar o seu apoio ao das profesionais da saúde.
Non todo vale
Manuel González Moreira, secretario nacional da CIG-Saúde, foi o encargado de ler en Compostela o manifesto que fechou a cada unha das concentracións nas distintas cidades. En declaracións a Nós Diario, porfiou na idea firme de solidariedade co pobo palestino no seu conxunto, mais destacou unha sensibilidade particular cara ao "sufrimento engadido" que achegan ao conxunto da poboación os bombardeos dirixidos a centros médicos. "Deixar as persoas necesitadas de asistencia sanitaria sen ese soporte supón un dobre sufrimento. Moitos hospitais servían como refuxio para as familias desprazadas, que se atopan con que o persoal non pode facer sequera o mínimo traballo de asistir feridos e trasladalos a centros sanitarios".
González Moreira censura esta crueldade inadmisíbel e consentida pola Unión Europea, os Estados Unidos e as Nacións Unidas, "que teñen a capacidade para parar isto".
Fronte a indiferenza internacional, a resposta e o rexeitamento das traballadoras da sanidade galega. Entre elas, Diana Míguez, técnica auxiliar de enfermaría no Álvaro Cunqueiro. "A miña foi unha mensaxe de apoio ás compañeiras palestinas e de denuncia da barbarie que están a soportar. O xenocidio e o bloqueo á axuda humanitaria non poden continuar. Se os que poden frealos non o fan, eu, como traballadora da sanidade, non podo ficar calada".
Neste sentido tamén se expresou Xabier Alvedro, enfermeiro no Clínico de Santiago. "Esta é unha mostra máis de compromiso e solidariedade cos nosos compañeiros en Palestina, albo da barbarie de Israel. Na guerra non está todo permitido. O persoal sanitario sempre foi respectado e nin en Gaza nin en Cisxordania o está a ser. Non é de recibo".