Quen é Héctor Moreno? Policía xubilado, torturador e, agora, condecorado polo Goberno español
O Ministerio do Interior vén de condecorar varios comisarios da Policía Nacional española coa medalla de prata á orde do mérito policial. En concreto, os comisarios Eloy Quirós, Francisco Javier Migueláñez, Francisco López Canedo, Francisco Rodríguez, José María Moreno Moreno, Manuel Páez e Héctor Moreno recibirán esta distinción, a máxima que poden obter, e pola que se lles incrementa 15% as súas pensións de maneira vitalicia.
Cando menos un dos nomes espertou polémica. É o caso de Héctor Moreno, condenado por desenvolver deteccións ilegais e torturas durante 1982. Os axentes que participaron con Moreno nestas torturas tamén falsearon os atestados policiais.
Condenado en 1994, o Goberno español de José María Aznar indultou o axente de policía en 1998, a pesar de que a xustiza considerara comprobado que Moreno torturou e detivo ilegalmente, cando menos, sete persoas.
En 2017, o Executivo de Mariano Raxoi, con Juan Ignacio Zoído como titular de Interior na altura, nomeou este policía xefe da Policía Nacional de Cantabria.
Condecoración do actual Goberno
O ministro de Interior do actual Goberno español, Fernando Grande-Marlaska, aprobou en setembto 2021 a concesión desta condecoración aos comisarios antes nomeados, entre os que sobresae Héctor Moreno.
As demandas presentadas por diferentes sindicatos policiais levaron a que o Xulgado Central do Contencioso-Administrativo número 11 da Audiencia Nacional anulase esta homenaxe, ao entender que ningún deles cumpría os méritos requiridos para recibir estas medallas de prata.
Agora, o Ministerio de Interior, con Grande-Marlaska á cabeza, volveu retomar o procedemento de condecoración destes comisarios xubilados da Policía Nacional española, a pesar dos argumentos esgrimidos pola xustiza contra esta decisión.