Policía tramita 400 propostas de sancións contra os manifestantes polo Escárnio e Maldizer

O delegado do goberno español na Galiza, Santiago Villanueva, recoñecía a comezos de semana, nunha entrevista na Radio Galega, que as forzas de seguridade facían seguimento de persoas polo simple feito de se manifestar. Unhas declaracións que o delegado facía a raíz das 116 identificacións que a Policía española fixera durante a manifestación do pasado sábado en Compostela contra o desaloxo do CSOA Escárnio e Maldizer.

Horas despois destas declaracións de Villanueva, a Dirección Xeral de Policía tramitaba, a través da Subdelegación do goberno español na Coruña, por volta de 400 propostas de sanción administrativa contra persoas que tomaran parte na manifestación do sábado na capital de Galiza.

 

Estas 116 persoas identificadas nesa mobilización serán propostas para sanción por dúas faltas graves: desobediencia ou resistencia á autoridade e por "negarse a disolver reunións e manifestacións en lugares de tránsito público cando o ordenen as autoridades". As multas nestes casos oscilan entre os 601 e os 30.000 euros.

 

Aliás, aqueles que foron identificados no interior das instalacións do antigo colexio Peleteiro enfróntanse a unha falta leve "por ocupación do inmóbel", que podería supor unha multa de entre 100 e os 600 euros.

 

Mais este regueiro de propostas de sanción non acaba aquí. A Policía tamén proporá sanción para outras 16 personas "que portaban paus", a dez "que levaban escudos que foron comisados" e a dous "por escalar os muros do colexio Peleteiro".

 

Ao tempo que se coñecían estas propostas, desde o Sindicato Unificado de Policía (SUP) pedían “sancións exemplares” e anunciaban que se ían personar naquelas causas penais relacionadas co Escárnio e Maldizer nas que houbese axentes anti-disturbios feridos