A frota ve a eólica mariña detrás do veto de Bruxelas á pesca de arrastre
A frota galega do arrastre veuse reducida en 26,1% na última década. Actualmente fan parte da mesma 128 buques, 28 dos cales desenvolven a súa actividade en caladoiros internacionais, 49 en augas comunitarias e 51 no denominado caladoiro Cantábrico Noroeste.
Precisamente, neste caladoiro deixaron de faenar 33 embarcacións desde 2012 aos que se suman outros 12 barcos presentes en augas internacionais. Só as augas comunitarias manteñen o mesmo número de arrastreiros de hai unha década, após as reconversións de 2009 e 2010.
Prohibición de 20% das augas
O presidente da Alianza Europea da Pesca de Fondo, Iván López, manifesta a Nós Diario a súa preocupación pola situación. Neste sentido, explica que o anuncio do comisario europeo de Pesca, Virginius Sinkevicius, de prohibir a arte do arrastre en 20% das áreas mariñas protexidas de cada un dos Estados da Unión Europea “busca alterar a Política Pesqueira Común (PCP) sen falar co Parlamento europeo e sen falar cos Estados membros”.
López non descarta a conexión entre esta proposta do comisario europeo de Pesca e a presión do lobby das enerxías renovábeis. Nesta liña, lembra “o escenario de necesidade enerxética actual marcado pola crise de Ucraína” e “o tipo de industria que está detrás dos proxectos de renovábeis, que dispón de moitos recursos económicos e conta con fundacións con capacidade para influír”.
O presidente da Federación Galega de Confrarías, José Antonio Pérez Sieira, sinala a Nós Diario “que hai unha axenda marcada para destruír a frota” e avanza que “esta decisión da Comisión Europea abre a vía a que novas embarcacións abandonen a actividade”. Na mesma dirección, afirma que “o veto á pesca en determinadas áreas das augas comunitaria está a crear impacto non só no arrastre senón en artes como o palangre”.
Eólica mariña
Pérez Sieira indica que “estamos vendo como a eólica mariña medra por todas partes” e “os emprazamentos escollidos para a mesma son onde están os nosos mellores bancos de pesca”. Nesa dirección, apunta que “os grandes lobbies das enerxías renovábeis teñen moitos recursos económicos para condicionar as decisións das institucións” e destaca que “Bruxelas está cheo de lobbies”.
O presidente da Asociación de Arrastreiros de Ribeira, Ignacio Vázquez, foi unha das primeiras voces autorizadas do sector pesqueiro en denunciar o papel dos operadores enerxéticos nas limitacións á actividade pesqueira.
Nesta liña, Ignacio Vázquez declara a Nós Diario que “a Comisión Europea está tomando decisións que afectan a pesca en base a informes elaborados polo propio lobby eólico, até o punto de que determinados informes científicos aparentemente neutros son financiados por estas compañías”.