O BNG derrogará a Lei de familia por ser ''un atentado contra os dereitos das mulleres''

Sexta feira, 28 de setembro. O mundo enteiro celebra o Día de acción global por un aborto legal, seguro e gratuito. En Compostela, na praza do Obradoiro, ocupando o espazo que deixan no medio un Concello en mans do PP e unha catedral símbolo do poder da Igrexa católica, ducias de persoas, mulleres na súa maioría, secundaron a concentración convocada polo BNG en prol dun aborto libre.

- Non é contraditorio para ti estar aquí cunha nena?

- Non. É simple: eu son unha muller e ela é unha muller. Cando medre, quero que poida decidir

O texto colocado riba destas liñas é a transcrición da breve conversa mantida entre dúas das persoas que se sumaron ao acto en defensa do dereito das mulleres á autodeterminación sobre os seus corpos. Un home colocouse a carón dunha muller que sostiña unha nena no seu colo e preguntoulle pola contradición entre ter parido e pular polo aborto. A resposta dela foi taxativa: non estaba alí por si propia, senón por todas as mulleres; dediciu libremente sobre a súa matenidade; e quere que a súa pequena teña tamén a posibilidade de decidir.

Dúas leis ditadas pola Red Madre e o Foro español de la familia
Para avanzar no camiño cara a esa posibilidade, o BNG compromoteuse a botar embaixo dous textos cuxo contido foi cortado polo patrón do patriarcado e que, disfrazados de apoio, vulneran directamente os dereitos das mulleres: as leis 5/2010, do 23 de xuño, pola que se establece e regula unha rede de apoio á muller embarazada, e a 3/2011, do 30 de xuño, de apoio á familia e á convivencia de Galiza.

As dúas foron redactadas ao ditado da Red Madre e do Foro español de la familia a través dunha ILP promovida a nivel estatal en defensa do matrimonio heterosexual e dun único modelo de familia. En palabras de Ana Pontón, voceira do grupo parlamentar do BNG, as dúas normas supoñen "un atentado contra os dereitos das mulleres", máis unha mostra da maneira de gobernar do PP, "en defensa da ideoloxía do Opus dei, desviando cartos das políticas de igualdade a organizacións relixiosas".

Ao fío, Goretti Sanmartín, secretaria de Acción feminista da formación frontista, chamou a facer da loita contra a violencia machista "unha cuestión de nación", loita que na Lei de familia do PP nin aparece mentada. "Estamos nun espazo onde nos arrodean poderes que intentan invisibilizarnos", apuntou, e chamou a mirar o mundo con lentes violetas e que a perspectiva de xénero faga parte de todas as políticas que se apliquen desde os gobernos, fiquen aquelas vinculadas ao eido económico, social, cultural ou laboral, fuxindo da "ligazón única" entre a crise e a fenda aberta no proceso de acumulación do capital.

"Feijóo empezou a lexislatura coa Red Madre e acabouna coa irrupción de Gallardón", sinalou Tereixa Paz, cabeza de lista do BNG por Ourense. Paz exemplarizou os tres anos de goberno ao servizo dunha ideoloxía coa mudanza "do asesoramento" nos centros Quérote "polo adoutrinamento" da Igrexa católica, para acabar por "volver meter os dereitos das mulleres no Código penal". Fechando o acto, o candidato á Xunta pola formación frontista chamou a frear "un modelo que no ideolóxico pretende impor a toda a sociedade un determinado sistema de valores".

Cambadela do PP ás mulleres
Na liña, repasou Jorquera unha serie de normas aprobadas nestes tres anos que supuxeron "un freazo" aos dereitos conquistados, como a contrarreforma laboral que puxo en xaque a conciliación da vida persoal e laboral, ou outra contrarreforma, a educativa, que pretende instaurar o financiamento de centros concertados que separan as crianzas polo sexo. Desde Madrid, o PP impón unha mudanza na regulación da interrupción voluntaria do embarazo que, de saír adiante, suporá un retroceso até antes da lei de 1985.

"Os datos demostran que a perspectiva punitiva é a máis grave" respecto do aborto, acrecentou o candidato nacionalista, pois "desprotexe as mulleres" e avócaas á clandestinidade, pondo en risco a súa saúde e as súas vidas. Por todo isto, e para evitar que o PP remate por "impor o seu integrismo relixioso convertido en lei", tal e como expresou Lucía Vázquez, vicerresponsábel do BNG en Compostela, a formación frontista chamou ás mulleres ás urnas o 21 de outubro, "para lles cobrar co noso voto a débeda contraída cos nosos dereitos".

Imaxes: Marcos Guisasola