3,2 millóns. Ese é o número de mortes anuais a nivel mundial causadas pola falta de actividade física, segundo a Organización Mundial da Saúde (OMS).
Con todo, un obxectivo alcanzábel, como camiñar 8.000 pasos uno ou dous días á semana (uns 6,4 quilómetros), podería reducir o risco de morte nun 14,9 por cento, de acordo cun estudo da Universidade de Kioto (Xapón) e a Universidade de California nos Angeles (Estados Unidos).
Os expertos recomendan realizar polo menos 30 minutos diarios de actividade física moderada, como camiñar. Algúns médicos recomendan dar 10.000 pasos ao día, pero cada vez hai máis estudos que indican que os obxectivos de pasos deben adaptarse á idade e ao estado físico de cada persoa.
Moitos estudos utilizaron a cuantificación dos pasos diarios como unha métrica sinxela e fiábel da actividade física e exploraron a correlación entre o reconto de pasos diarios e diversos resultados de saúde, como a demencia e as enfermidades cardiovasculares.
Redución do risco de mortalidade
Esta nova metaanálise, publicada na revista científica JAMA Network Open, evidenciou unha asociación entre un aumento dos pasos diarios e unha redución gradual do risco de mortalidade. Esta asociación mantense até que se alcanza un limiar de aproximadamente 8.000 pasos diarios, a partir do cal o risco de mortalidade permanece constante.
No estudo, os investigadores avaliaron a correlación entre as taxas de mortalidade dos adultos e o tempo que dedican á actividade física, concretamente a dar 8.000 pasos ou máis ao día.
O estudo utilizou datos da Enquisa Nacional de Saúde e Nutrición de Estados Unidos, realizada en 2005 e 2006, que posteriormente se vincularon ao Índice Nacional de Defuncións até 2019. Da mostra total de 4.372 persoas de 20 anos ou máis, 3.120 participantes posuían datos sobre o uso dun acelerómetro durante polo menos catro días, que se utilizou para calcular o seu reconto de pasos diarios.
De 2005 a 2006, a enquisa solicitou aos seus participantes que levasen un acelerómetro montado na cintura durante as horas de vixilia durante sete días. O estudo consistiu en rexistrar o número de pasos durante intervalos de 60 segundos cada día.
Para avaliar os patróns de pasos semanais, o estudo incorporou participantes que tiveron un mínimo de catro días con polo menos 10 horas de tempo de uso, durante os cales o acelerómetro rexistrou recontos de pasos. Os participantes clasificáronse en tres grupos en función da frecuencia coa que alcanzaban un mínimo de 8.000 pasos semanais: cero días, dun a dous días e de tres a sete días.
O número medio de pasos diarios foi de case 8.793. O estudo revelou que, do total de participantes, 632 persoas declararon dar 8.000 pasos ou máis en cero días á semana, mentres que 532 deron 8.000 pasos ou máis dun a dous días á semana.
Ademais, 1.937 participantes declararon dar 8.000 pasos ou máis entre tres e sete días á semana. As persoas que daban 8.000 pasos ou máis á semana eran máis novas, homes, de etnia hispana, con seguro médico, casados e non fumadores.
Ademais, eran menos propensos a declarar obesidade ou cualificar a súa saúde de mala ou regular, en comparación cos que daban menos de 8.000 pasos durante menos días á semana.
Durante dez anos de observación, detectáronse 439 mortes por diversas causas e 148 mortes atribuídas especificamente a enfermidades cardiovasculares.
Tras controlar as posíbeis variables de confusión, observouse que as persoas que daban 8.000 pasos ou máis dun a dous días por semana e de tres a sete días por semana presentaban unha redución do 14,9 e o 16,5% do risco de mortalidade por todas as causas a dez anos, respectivamente, en comparación coas que non o facían.
Ademais, os que realizaban actividade física dando 8.000 pasos ou máis dun a dous días por semana e de tres a sete días por semana presentaban unha redución do risco de mortalidade cardiovascular a 10 anos do 8,1 e o 8,4%, respectivamente, en comparación cos que non o facían.
O estudo tamén apunta que as persoas pertencentes tanto a grupos de idade máis novas como de máis idade presentaban un menor risco de mortalidade por todas as causas ao longo de dez anos cando declaraban dar 8.000 pasos ou máis dun a dous días por semana ou de tres a sete días por semana, en comparación cos que non realizaban ningunha actividade física cero días por semana.
