As "infraccións" da multinacional Babcock abalean o servizo público de rescate marítimo

Gardacostas é un servizo público galego, dependente da Consellaría d0 Mar, que enmarca labores de salvamento marítimo, loita contra a contaminación mariña e tarefas de vixilancia. Un servizo público, porén, onde a multinacional británica Babcock International —agora Avincis—é a adxudicataria de operar e manter os dous helicópteros de Gardacostas, un na base de Vigo e outro na de Celeiro (Viveiro). Unha empresa privada que ten, pois, unha enorme responsabilidade nuns servizos vitais para sectores coma o do mar. Porén, e segundo denuncian desde persoal deste servizo de rescate aéreo, a multinacional acumula "moitos incumprimentos" de cláusulas do contrato coa Xunta sen que esta "faga nada a pesar das denuncias e queixas recibidas", afirman. Unha situación, sempre segundo estas mesmas fontes, que condiciona o propio labor e responsabilidades que desenvolven en áreas tan sensíbeis como a do salvamento. As bases de Vigo e Celeiro teñen por volta de 40 traballadores. Cada garda nunha delas operan dous pilotos, un operador de grúa e un rescatador. "Acumulamos 2.000 horas de gardas ao ano", indica un traballador do servizo, que incide na falta de persoal "suficiente" para un servizo desta responsabildiade. Ancala Partners, socio de Ence, adquire concesións para a xestión de incendios na Galiza en plena vaga de lumes Medios Entre as denuncias máis destacadas está a de que os helicópteros de substitución que dispón a empresa—son aqueles que se empregan cando os titulares non están operativos por avaría ou mantemento— carecen de elementos que se exixen no contrato coa Xunta e que ademais o persoal considera de importancia para o seu labor, como que a aeronave dispoña dúas grúas de rescate. "Nun operativo de rescate podes verte obrigado a picar o cabo dunha das grúas mais tes a outra opara seguir. Se non, tes que abandonar a misión e volver a terra", explica un operario. Tamén denuncian que eses heliópteros de substitución carecen de cámaras térmicas, elemento que consideran "importantisimo" para poder operar nos rescates, principalmente de noite ou con escasa visibilidade. "Entre avarías e mantemento no helicóptero titular, na base de Celeiro pódese estar medio ano cun helicóptero substituto", aparato que carece dos medios mencionados. Babcock, socia da Xunta no polo de Rozas, prepara a súa marcha de España Hangar Nesta mesma base, aliás, dáse unha circunstancia chamativa: o hangar que acolle o helicóptero é pequeno de máis, o que obriga a que as operacións para metelo e sacalo "impliquen moita manobra e máis tempo, porque colle xustiño". Afirman desde o persoal que no prego de condicións do último contrato a Xunta pedíase á adxudicataria que asumise aquelas obras necesarias nas instalacións, "mais o hangar segue como estaba", din "e desde a Xunta miran para outro lado". Os "incumprimentos" non finalizan aí, afirman estas fontes do colectivo de traballadores que operan neste servizo aéreo de rescate. Denuncian tamén equipamentos onde "non prima a seguridade nin a operatividade", ou falta de persoal. Esta situación "inasumíbel", segundo estes traballadores, vai chegar ao Parlamento galego nos vindeiros días a través dunha proposición non de lei e unha interpelación presentadas polo BNG. A Consellería do Mar prorrogou en 2021 por dous anos máis, até outubro deste ano, 2023, o contrato que en novembro de 2017 asinou con Babcock após un concurso público para prestar o servizo de salvamento marítimo durante catro anos por 33 millóns de euros. Un concurso no que non houbo máis candidaturas presentadas, só a de Babcock Internacional. Eses catro anos de contrato finalizaron en 2021 mais a Xunta, no canto de convocar un novo concurso, optou por prorrogar o contrato o máximo posíbel, outros dous anos, e por un importe de algo máis de 16 millóns de euros. A estas alturas, marzo de 2023, ese servizo de salvamento marítimo séguese a prestar cos dous helicópteros que a Xunta mercou en 2005 por 27 millóns de euros en Estados Unidos. Aeronaves que en 2012 a Administración galega vendeu a Inaer, adquirida por Babcock, por 12 millóns de euros, e que son os que continúan operativos nas bases de Gardacostas en Vigo e A Mariña. A Xunta, condenada a pagar xuros polos helicópteros nas emerxencias Negocios diversos coa Xunta Babcock non só centra os seus intereses na Galiza no salvamento marítimo. Participa tamén como socio da Xunta —canda Airbus, e Telespazio— do polo aeroespacial de Rozas, no Concello de Castro de Rei, na comarca da Terra Chá. Ademais, posúe coa Xunta outro contrato que ten por obxecto o servizo integrados de helicópteros, técnicos coordinadores e analistas para a prevención, vixilancia e coordinación de medios aéreos de defensa contra incendios forestais. Este contrato prorrogouse até finais do mes de xuño deste ano e adxudicouse por algo máis de 2 millóns de euros.