O Concello de Vigo recoñeceu que a colocación dalgunhas instalacións do Nadal non ten aínda permiso, a pesar de que quedan dous días para prender as luces da cidade, que levará a cabo a vindeira sexta feira, 24 de novembro, a partir das 20 horas.
Nun comunicado, o Goberno vigués admite que están precintadas pola Policía Local as carpas situadas nos xardíns Eugenio González, en Areal, onde se situará a exposición Dinoworld.
Todo iso porque aínda está en tramitación a autorización de ocupación da vía pública. "Unha vez recibida, levantarase o precinto para poder proseguir a montaxe", engadiron desde o Concello.
Ademais, tamén certa maquinaria utilizada para a montaxe do mercado de Nadal 'Cíes Market', que se levanta en praza de Compostela, tamén está precintada, á espera de que os responsábeis presenten a documentación pertinente para poder ser utilizada.
A pesar disto, o Goberno local destaca que este mercado continúa en construción sen as máquinas paradas, xa que conta coa autorización necesaria.
"O 'Cíes Market' dispón da pertinente autorización municipal para realizar a montaxe e, unha vez concluído, deberá presentar a documentación necesaria para a súa posta en marcha e así obter a licenza de actividade, tal e como procede nestes casos", sentenciou o Concello.
Todo iso despois de que hai semanas a asociación de Veciños Zona Centro de Vigo denunciase que se iniciou a montaxe de instalacións do Nadal sen a pertinente licenza ou autorización municipal. A propia administración municipal confirmoulles que, até 2 de novembro, non se concluíron os expedientes de tramitación da prórroga do contrato para a celebración do 'Cíes Market', a pesar de que xa se estaba montando.
Por iso, os veciños cargaron contra a "maneira de actual do Concello", despois de que o responsábel da montaxe asegurase a axentes da Policía Local que tiñan autorización verbal para o mesmo por parte do Concello, xa que aínda non se tramitou o contrato.
