O fiscal xeral do Estado español, Álvaro García Ortiz, asegurou que a decisión do fiscal Mario Piñeiro de retirar a acusación contra o ex director de seguridade do administrador de infraestruturas ferroviarias (Adif), Andrés Cortabitarte, no xuízo polo accidente do tren Alvia, foi "perfectamente coherente". "Por suposto, non houbo inxerencia da Fiscalía Xeral", engadiu.
Cuestionado por xornalistas sobre a súa valoración da decisión do fiscal do caso de manter só a acusación contra o maquinista do Alvia que descarrilou en Angrois (Compostela), en xullo de 2013, onde morreron 80 persoas e 145 resultaron feridas, García Ortiz dixo que se trata dun xuízo "moi importante", no que "en todas as sesións sobrevoa a dor das vítimas". "Co absoluto respecto creo que o labor da Fiscalía foi perfectamente defendido polo fiscal Mario Piñeiro", insistiu.
O fiscal xeral do Estado español reiterou que "a Fiscalía foi coherente durante toda a instrución", en canto a que "había que levar ao xuízo todos os elementos probatorios para determinar se a conduta era digna dunha acusación do fiscal ou non", en alusión a Cortabitarte.
"Unha vez celebrado o xuízo, a decisión do fiscal que leva o caso é a que respectou a Fiscalía Xeral, é unha decisión adecuada", engadiu e recalcou que "por suposto non houbo inxerencia da Fiscalía Xeral".
Respecto á sentenza, sinalou que a xuíza ten un labor "moi difícil". "Non hai que engadirlle nin un gramo de presión máis a unha decisión xudicial que está cargada de sentimento, cargada de dor e tamén ten que estar cargada de xustiza", concluíu.
Noutra orde de cousas, a preguntas dos medios sobre a polémica do nomeamento de Dores Delgado como nova fiscal de Memoria Democrática e Dereitos Humanos, García Ortiz manifestou non ter "ningún tipo de dúbida" respecto diso. "Para min era a mellor candidata sen ningún tipo de dúbida", sentenciou. Con todo, lembrou que existe "o dereito ao recurso".
Escola de verán
O fiscal xeral do Estado español fixo estas declaracións antes de clausurar a Escola de Verán do Ministerio Fiscal, no Pazo de Mariñán, situado en concello de Bergondo (comarca da Coruña).
No acto participaron tamén o fiscal superior da Galiza, Fernando Suances; o delegado territorial da Xunta na Coruña, Gonzalo Trenor; e o deputado provincial José Ramón Rioboó.
A escola de verán é "un referente" para García Ortiz, quen puxo en valor a importancia de "falar do que somos como fiscais e do que queremos ser, cara a onde imos e nos diriximos".
