A fiscal de Medio Ambiente compara o 'boom' eólico actual co urbanístico da crise de 2008: "Hai que facelo con moderación"
A fiscal delegada de Medio Ambiente na Galiza, Carmen Eiró, remarcou que a construción de parques eólicos debe facerse "con moderación" e compara o 'boom' da enerxía eólica co acontecido en materia de urbanismo a partir de 1999 e até 2006.
Así o fixo nunha entrevista na Cadena Ser, na que detallou que na Galiza actualmente hai 182 instalacións cun total de 3.886 megawatts, o que representa 14% da produción a nivel estatal.
En canto a estes datos, sinalou que "hai que facelo con moderación". "Non podemos separar a construción dun parque eólico do que é a ordenación do territorio", apostilou.
A fiscal remarcou que a construción de parques eólicos "non é soamente" un impacto ambiental senón que tamén se debe ter en conta o chan onde se van situar esas infraestruturas. "Hai que ter en conta a ordenación do territorio", puntualizou.
"Non se pode perder a perspectiva da ordenación do territorio e eu creo que esta perspectiva si que se perde un pouco na construción dos parques eólicos", lamentou.
Preguntada sobre a modificación da Xunta da Galiza a través da lei de acompañamento dos orzamentos para 2024 para declarar os parques eólicos proxectos de interese público, advertiu que, sobre todo desde o punto de vista xurisdicional, "non se poden perder de vista" cales son as garantías e cales son os requisitos e "sobre todo" a protección ambiental.
Lei galega do Litoral
En referencia ao enfrontamento entre o Executivo galego e o Goberno español polas competencias sobre a Lei galega do Litoral, a fiscal sinalou que "é unha cuestión constitucional" que non se sabe como vai ser e ao seu modo de velo "hai argumentos a favor e en contra". Con todo, Eiró considerou que é unha cuestión "meramente administrativa" e que a nivel penal, cre, que "non será de gran calado".
Por outra parte, a fiscal foi preguntada polos delitos de furtivismo e cualificouno como "un negocio ilegal organizado" porque a "raíz profunda do problema" é que é estrutural.
Ante isto, apelou a unha "cooperación dos corpos de seguridade" xa que cando é un delito cometido transfronteirizo moitas veces "non somos competentes".
Outro dos temas abordados na entrevista foron os incendios forestais. Eiró asegurou que os de sexta xeración cada vez "son máis difíciles de investigar" e máis virulentos polo "amplo combustíbel forestal".