Falemos de Baltar e tamén de Feixoo

A noticia é que José Manuel Baltar Blanco, fillo de José Luis Baltar, conducía un coche oficial da Deputación de Ourense a 215 quilómetros por hora pola A-52. Explicou que se dirixía a Madrid para participar en "reunións", que debían ser clandestinas porque non figuraban na axenda oficial. Coñezo o sistema desas citas clandestinas en Madrid hai 50 anos para recoller propaganda contra a ditadura: tiña que levar a revista Pronto na man e cando o compañeiro que traía o paquete preguntaba: "¿Dónde está la Puerta del Sol?", eu tiña que responder: "Vai un sol de carallo". A entrega producíase cando o sinal e o contrasinal se axustaban ao previsto. A falta de atención de Baltar é preocupante porque acadou esa velocidade por un "despiste". Tampouco vou entrar no debate xurídico: se excede en 80 sobre o sinal de prohibición de circular a máis de 120 quilómetros por hora podería ser condenado polo delito contra a seguridade viaria e a penas entre 3 e 6 meses de cárcere. Será condenado Baltar, que se negou en dúas ocasións a comparecer ante a xuíza –declarou vía telemática esta quinta feira poucas horas despois da segunda incomparecencia–? Veremos. Non vou falar da denuncia dunha muller en 2015 que acusaba Baltar de ofrecer un posto de traballo na Deputación a cambio de favores sexuais. Deixemos o asunto da infracción de tráfico e outros para centrarnos no tema de fondo: o poder político dos Baltar e a corrupción. A dinastía Baltar Hai quen tamén fala do clan Baltar, de "capo" ou "cacique bo", referíndose ao patriarca José Luis Baltar. Esta dinastía controla a provincia de Ourense desde hai máis de trinta anos e ordena, manda e recolle máis do 50% dos votos, controlando a Deputación e decidindo quen vai ao Parlamento Galego ou ás Cortes. José Manuel Baltar, deputado do Parlamento Galego desde 2001, foi un dos protagonistas da coñecida como "Revolta do piso", peche simbólico no piso dun dos cinco deputados do PP de Ourense no Parlamento Galego, coincidindo coa toma de posesión de Feixoo como conselleiro de Política Territorial o 20 de xaneiro de 2003 como substituto de Cuíña. Era a resposta do sector alcumado como o da boina, fronte ao sector do birrete, que tiña como referente a Romai, padriño de Feixoo. Os da boina enviaron unha carta a Fraga e a Aznar e conseguiron, daquela, a destitución de Jesús Palmou como secretario xeral do PP de Galiza. Feixoo é o máximo responsábel da situación política en Ourense En 2004 continuaron os enfrontamentos. José Luis Baltar ameazaba con darse de baixa do PP ante o avance do sector máis dependente de Madrid e reclamaba poder de decisión na elaboración das listas para as eleccións galegas. Cando Feixoo é elixido como líder do PP de Galiza en 2006 intenta desprazar José Manuel Baltar como líder provincial en 2010, pero fracasa. Non sabemos se Feixoo é hoxe dos da boina ou dos do birrete, pero sabe moi ben quen manda en Ourense. Corrupción José Luis Baltar foi condenado en xullo de 2014 a nove anos de inhabilitación para cargos públicos por "prevaricación continuada", despois de presidir durante 22 anos a Deputación de Ourense. A sentenza sinalaba que utilizou a deputación como "unha empresa privada" para contratar irregularmente 104 persoas –familiares e persoas integrantes das listas do PP– sen oferta pública de emprego. Emilio Pascual Vázquez, que foi xerente provincial do PP de Ourense de 1983 a 2010, declaraba ante a xuíza Pilar de Lara que todos no PP tiñan coñecemento da existencia da caixa B e que recibiu de Baltar 24.000 euros en negro cando deixou o partido. A xuíza concluía que "el Partido Popular de Ourense se habría podido financiar ilícitamente a través de un elaborado sistema de facturación falsa y ficticia". Nas eleccións municipais de 2019, en Ourense, Feixoo cualificaba como "letal" a posibilidade dun pacto con Gonzalo Pérez Xácome, de Democracia Ourensá (DO). A candidatura máis votada foi a do PSOE e Feixoo non dubidou en regalar a Alcaldía a DO a cambio de dous votos de DO para que Manuel Baltar continuase como presidente da Deputación. Pero Feixoo segue predicando que o PP defende que goberne a candidatura máis votada. Concluíndo, Feixoo é o máximo responsábel da situación política en Ourense. Bendiciu o traspaso de pai a fillo da Presidencia da Deputación. En marzo de 2016, en presenza de Feixoo, Manuel Baltar era elixido presidente provincial do PP de Ourense co 95,66% dos votos. Ampara as prácticas corruptas de Manuel Baltar e cala ante as irregularidades de Xácome, que é investigado pola Fiscalía por uns audios nos que fala de pedir doazóns ilegais a empresas e enchufar aos seus asesores en concesións municipais. Feixoo nunca pedirá a Manuel Baltar que dimita porque sabe que os votos de Ourense son fundamentais para que o PP manteña a maioría no Parlamento galego nas eleccións previstas para 2024.