O BNG esixiu este sábado "o cesamento inmediato" da actual Dirección da Corporación de Radio e Televisión da Galiza (CRTVG) tras a admisión a trámite por un xulgado compostelán da querela dunha empregada por suposto acoso moral e contra os dereitos dos traballadores, unha información que adiantou este xornal en exclusiva a pasada sexta feira, 9 de xuño. Con todo, o ente público ve "unha réplica de accións previas e xa xulgadas" ao seu favor.
Nun audio remitido aos medios, a deputada nacionalista Olalla Rodil fala da "imputación dunha importante parte da dirección da CRTVG, incluído o director xeral, Alfonso Sánchez Izquierdo", por mor dunha información publicada por Nós Diario, que apunta que os oito directivos sobre os cales se dirixe a querela terán que declarar, "en calidade de investigados, aínda que dita dilixencia sinalarase unha vez se practique a declaración da querelante", despois do próximo 28 de setembro.
Olalla Rodil ve que é "gravísimo" e considera que "a actual Dirección debe ser cesada de maneira inmediata" porque "non é a primeira vez que pasa". Alude a dúas condenas contra a CRTVG "por vulnerar os dereitos de conciliación de dúas traballadoras", á condena por "perseguir politicamente" a un xornalista coñecida hai un ano e a unha investigación aberta polo Consello de Contas "por presuntas irregularidades no proceso de licitación de contratación pública das conexións en directo".
Sen coñecemento da querela
Fontes da CRTVG consultadas aseguraron que nin a compañía de radiotelevisión pública nin ningunha das persoas contra as cales se dirixe a querela por suposto acoso laboral recibiron até este sábado notificación ao respecto. Pero puntualizan que á vista do publicado, "tanto pola coincidencia na temática como polas persoas acusadas, pódese asimilar que esta querela é unha réplica de accións previas e xa xulgadas".
Respecto diso, estas fontes expoñen que en 2018, un traballador presentou unha denuncia perante o xulgado do Social contra a CRTVG por un cambio de localización de posto de traballo, "cuxo fallo foi favorable á corporación" nunha sentenza que "é firme". Xa en 2019, presentou unha queixa ante a Valedora do Pobo, cuxa titular determinou que esa institución "non é competente para avaliar os feitos".
Posteriormente, en 2020, segundo o ente público, ese traballador presentou unha denuncia contra directivos por vulneración de dereitos fundamentais, pero asegura que o xulgado do social ditou sentenza "desestimando integramente todas as pretensións e por tanto, favorable á CRTVG e aos directivos acusados". "A sentenza foi ratificada polo Tribunal Superior de Xustiza de Galicia en 2021, polo que o fallo é firme", agrega.
Así mesmo, a CRTVG sostén que a nivel interno abríronse dous procedementos para activación do protocolo de prevención contra o acoso, con comisións formadas por dous integrantes da empresa e dúas de da parte social. "En ningunha das dúas comisións se concluíu que existisen indicios de condutas compatíbeis con supostos de acoso laboral", afirma o ente dos medios públicos galegos.
O BNG ve unha situación "insoportábel"
Con todo, a deputada do BNG Olalla Rodil lembra que os traballadores e as traballadoras dos medios públicos galegos "levan anos denunciando a manipulación e as represalias que soportan por parte dunha dirección que puxo á CRTVG ao servizo dos intereses do PP".
"Están a levar aos medios públicos da Galiza a unha situación insoportábel e deben ser cesados de inmediato, comezando polo director xeral, que se mantén no cargo en contra do que di a lei só por seguir facendo da TVG e da Radio Galega a terminal de propaganda do PP", proclama Olalla Rodil.
