Unha das citas de maior repercusión das Festas de María Pita a fin de semana pasada foi o Festival Independente de Rock Coruñés, que tivo lugar no auditorio de Santa Margarita organizado polo concello, que malia iso non se librou das críticas por parte das dúas bandas cabeza de cartel, que utilizaron os seus concertos para apoiar á plataforma Stop Desafiuzamentos nas súas demandas e, de xeito moi concreto, contra das represalias en forma de sancións que están a recibir militantes ou simpatizantes após participar na mobilización contra o despexo de Aurelia Rei.
Así, ante unhas 4.000 persoas, tanto durante a actuación dos punks locais de Konflicto como na dos madrileños -con algún galego- Def con Dos os seus cantantes tiveron palabras de apoio para Stop Desafiuzamentos, cuxa camiseta foi visíbel no escenario, ao igual que unha gran pancarta en contra da criminalización dos movementos sociais, precisamente a mesma que encabezou unha recente manifestación na cidade convocada contra a represión e as multas a activistas e na que se escoitaron fortes críticas contra o delegado do goberno español en Galiza e tamén contra o alcalde do PP na Coruña, Carlos Negreira. De feito, entre @s asistentes ao concerto tamén se puido ver outra faixa co lema daquela marcha, a que dicía “Múltannos a nós para asustarte a ti”.