O Concello da Illa de Arousa formalizou esta segunda feira ante a Garda Civil a denuncia polas desfeitas vandálicas no cruceiro situado na rúa Illa ocorridos na madrugada deste domingo e que, ao seu xuízo, conforman un delito contra o patrimonio histórico xa que se trata dun ben datado no século XIX.
Tal como indicou nun comunicado o Goberno local, desta maneira dará comezo unha investigación para buscar testemuñas que permitan identificar as persoas implicadas no acontecemento.
Os feitos
"O atentado contra o cruceiro deixou a súa cruz rota en dez anacos, que o Concello custodia no almacén municipal á espera de coordinar con Patrimonio como proceder á súa restauración", indicou o Concello.
Neste sentido, o concelleiro de Servizos, Luís Arousa, mostrou a súa intención de devolver o conxunto ao seu estado orixinal, recompondo os anacos até formar unha única peza que volva coroar o cruceiro.
Posíbel reposición artesanal
De non ser posíbel, apostou pola súa reposición artesanal.
Arousa considerou "inaceptábel" que se atente contra o patrimonio común con total impunidade e solicita á veciñanza colaboración cidadá para esclarecer os feitos e velar pola conservación de elementos históricos e de obras novas que están en execución.
