A columna galego-portuguesa da Marcha a Gaza regresa á casa: "Non chegamos a Rafah pero chegamos moito máis lonxe"
Os cinco integrantes da columna galego-portuguesa da Marcha a Gaza retidos no Cairo desde a pasada quinta feira, 12 de xuño, regresan á Galiza. Así o anunciaron nun vídeo no agradecen "a colaboración e o ánimo da xente que quere a paz e a xustiza" e no que recoñecen sentirse "orgullosos" da súa travesía malia non lograr o obxectivo final de alcanzar o paso de rafah.
Xosé Abad, Xan Lopes, Amaia Pérez Izaguirre Urquizo, Inácio Caranza e Manuel Vázquez foron detidos na cidade exipcia de Ismailía cando tentaban chegar a localidade de El Airish para dar comezo á acción internacional de solidariedade con Palestina. "En Ismailía retiráronnos o pasaporte e estivemos alí durante varias horas até que nos deixaron en liberdade", explicaba Lopes a este xornal.
Foron liberados poucas horas despois mais sinalaron as presións de Israel sobre o Goberno exipcio para evitar a súa mobilización, unha "misión heroica", que segundo sinalaron esperan que contribúa a visibilizar o xenocidio e a situación de bloqueo que sofre a poboación de Gaza baixo o xugo de Israel. "Non chegamos a Rafah pero chegamos moito máis lonxe", salientou Xosé Abad.
"Síntome privilexiado de participar nesta marcha que rematou antes do previsto mais cuns obxectivos cumpridos, como foi romper o bloqueo mediático para que todo o mundo poida ver o que está sucedendo: o xenocidio e que non deixan pasar axuda humanitaria, medicamentos, alimentos", resumiu Inácio Caranza, quen denunciou unha guerra perpetrada por Israel e amparada pola OTAN que non pode ficar "oculta", dixo. "Que as voces populares rebenten en todos os estados e cidades e obriguen os gobernos a romper relacións con Israel".
Os integrantes da columna galego-portuguesa da Marcha a Gaza chaman a "tomar posición contra o xenocidio". Acompañei este movemento cidadán, altruista, voluntario e apartidista para defender o dereito máis importante de todos, que é a vida", destacou Manuel Vázquez.
A decisión de regresar á casa dos cinco activistas galegos tamén pon fin á folga de fame que iniciou Xan Lopes esta fin de semana ante a prohibición das autoridades exipcias de desprazarse a Rafah e contra o xenocidio que Israel.
