Xan Lopes, integrante da columna galega da Marcha a Gaza, inicia unha folga de fame no Cairo

Xan Lopes, integrante da columna galego-portuguesa da Marcha a Gaza, inicia este domingo no Cairo, en Exipto, unha folga de fame ante a prohibición das autoridades exipcias de desprazarse a Rafah e contra o xenocidio que Israel está a perpetrar en Palestina.

A partir da mañá deste domingo, Lopes toma dúas medidas: fecharse no seu cuarto do hotel no que se hospeda no Cairo e deixar de comer e beber só auga. Farao, explica nun vídeo, "até que ou ben o Goberno exipcio autorice a Marcha [a Gaza] ou ben teña que me ir o día 22 [de xuño]".

Detrás da iniciativa Lopes para iniciar esta folga de fame está a solidaridade "coas persoas, nomeadamente as crianzas, que viven esta situación [o asedio de Israel sobre os territorios palestino] de forma criminal e ilegal, motivada pola barbarie sionista".

Ademais, o integrante da columna galega busca "reclamar un cambio de actitude ao Goberno de Exipto, ao que solicitamos en tempo e forma o seu permiso" para acceder a Rafah. Con todo, Lopes agradece "ao pobo exipcio a súa amabilidade, compresión e, nalgún caso, incluso empatía e simpatía. Un pobo milenario sabio e xeneroso".

"Son galego, fillo dunha pequena nación sen Estado, mais como dicía un dos líderes da nosa nación e da súa liberdade, o gran Castelao, Galiza é unha célula de universalidade. Pero Palestina é libre", explica. "Contra o fascismo e o sionismo, pola paz e solidariedade entre os pobos", conclúe Xan Lopes.

Lopes, xunto a outros catro galegos, atópase no Cairo desde a quinta feira. Foron detidos na cidade exipcia de Ismailía cando tentaban chegar a localidade de El Airish para dar comezo á acción internacional de solidariedade con Palestina. "En Ismailía retiráronnos o pasaporte e estívenos alí durante varias horas até que nos deixaron en liberdade", explicaba Lopes a este xornal. Foron liberados poucas horas despois mais sinalaron a presións de Israel sobre o Goberno exipcio para evitar esta mobilización.