A CIG vén de anunciar a convocatoria dunha folga xeral na educación galega para a vindeira terza feira 24 de outubro, co obxectivo de mostrar o seu rexeitamento ao acordo de baixada de ratios e de horarios, que considera "insuficiente" e unha "chantaxe" por parte da Xunta da Galiza. Así o avanzou o secretario nacional da CIG-Ensino, Suso Bermello, nunha rolda de prensa ofrecida hoxe, última xornada na que os sindicatos na mesa sectorial docente non universitaria —na que tamén están CCOO, ANPE e UXT— deben comunicar se asinan ou non a proposta da Consellaría de Educación.
A central sindical nacionalista, que é maioritaria no ensino galego, fai un chamamento ao resto de organizacións a non aceptar o documento definitivo que na segunda feira lles trasladou a Administración e a sumarse ás mobilizacións, mesmo coa posibilidade de acordar unha data alternativa. En concreto, o documento final da Xunta recolle unha redución graduada das ratios en centros públicos e privados concertados que arrincaría no curso escolar 2024-25 ao pasar de 25 a 20 alumnos por cada clase en 4º de Infantil.
Ano a ano iríanse incorporando o resto de cursos, até que no 2032-33 estean aplicados até 6º de Primaria. En ESO e Bacharelato, o compromiso é de negociar a baixada a 25 e 30 alumnos por aula, respectivamente, unha vez o calendario estea xa implantado en Infantil. Con respecto ao horario lectivo, unha cuestión que todos os sindicatos marcaban como 'liña vermella', o acordo que ratificarán tres deles implica unha redución de 25 a 23 horas semanais de clase en Infantil e Primaria —antes do ano 2011 eran 21—. Conseguir máis avances neste sentido estaría vinculado á próxima negociación da xornada de 35 horas para todos os funcionarios da Xunta.
O documento tamén incluirá incrementos retributivos nos complementos por formación permanente (+15%) e por exercer labores directivos (+60 euros ao mes) que estarán aplicados por completo o 1 de xaneiro de 2026. Así mesmo, crearase xa este curso un grupo de traballo que estudará como relaxar os labores burocráticos dos docentes.
O secretario nacional de CIG-Ensino tachou de "trágaa" este acordo que foi froito dunha "negociación acelerada e exprés" por parte da Consellaría, totalmente "condicionada polo momento político", a meses das eleccións galegas e en plena celebración no Parlamento do Debate do Estado da Nación. Bermello fixo unha valoración "moi negativa, polas formas e polo fondo", desta negociación coa que, ao seu xuízo, a Xunta fixo "unha chantaxe" ás forzas sindicais. "Hai alguén que no seu san xuízo pense que o presidente [Alfonso] Rueda, que está nun vórtice electoral, estea disposto a anunciar que non vai reducir os rateos por capricho?", preguntouse.
Ante este documento que "non incorpora ningún avance", a CIG-Ensino avanzou a súa intención de convocar unha folga xeral na educación galega para o 24 de outubro, con motivos similares á que xa se celebrou en decembro de 2019. Na rolda de prensa, decorrida unha hora antes de que finalizase o prazo para que o resto de sindicatos comunicasen á Consellaría se aceptaban ou non o acordo, Suso Bermello pedíralles que se sumasen á protesta, coa posibilidade de pactar unha data alternativa.
A folga será para que "o profesorado tome a palabra" e se mobilice "contra un acordo que, aínda que introduce algunhas melloras, é insuficiente, unha trampa e unha traizón". O responsábel de CIG-Ensino recoñece que están dispostos a "asumir os riscos" de promover esta acción de protesta en solitario. "Hai xente, afiliada ou non, que votou por CIG-Ensino que entendería que non nos revelásemos contra este acordo? Eu estou seguro de que non. Eu estaría cabreadísimo", sentenciou. E é que Bermello considera que "non se tiveron en conta" as súas peticións para reducir o horario lectivo e que a proposta de rateos é "arbitraria e aberta a excepcionalidades" e a diferentes "interpretacións", porque non se estabelecen nun decreto ou nunha orde.
CCOO, ANPE E UXT apoiarano e destacan as "melloras"
Mentres tanto, o resto de forzas sindicais xa confirmaron esta terza feira á Consellaría que asinarán o documento nun acto que está previsto para esta cuarta. O portavoz de CCOO-Ensino, José Manuel Fuentes, destaca en declaracións a Europa Press as "melloras para todo o sistema educativo" que vai supor o documento e que se implantarán "xa" o curso que vén. De feito, Fuentes salienta que, ao longo do diálogo coa Consellaría, conseguiron que a Administración introducise a cuestión do horario lectivo en Infantil e Primaria, aínda que no resto de niveis está vinculado á implantación das 35 horas para todos os funcionarios. "Non é unha renuncia, é unha dilatación", valora CCOO.
"O primeiro documento era moi raquítico e fomos capaces de introducir melloras coa negociación. Non é un documento ideal, pero entendemos que nas negociacións sempre pasa iso", explicou o presidente de ANPE na Galiza, quen recoñeceu que queda "un resquemor" de non conseguir máis avances en canto á carga horaria. Neste sentido, ANPE esixirá xa esta cuarta feira á Consellaría de Facenda que arrinque o diálogo para implantar as 35 horas para todos os empregados públicos.
Por parte de UXT, Sandra Montero ratifica a sinatura do acordo porque "é un camiño" cara á súa "meta", a pesar de que admite que "non é suficiente". Por iso, o seu sindicato xa está a pensar en posteriores mobilizacións ou outras accións para conseguir máis melloras.
Sobre a folga convocada pola CIG, José Manuel Fuentes (CCOO) expresa o seu "respecto", aínda que non comparte esta "estratexia" que tivo a organización nacionalista de "negarse a facer propostas" na propia mesa sectorial e de agora expor este paro "contra o acordo" e non contra a Administración. Julio Díaz (ANPE) di non entender como "o sindicato que se di maioritario" está "a dicir sempre que non", sen alcanzar ningún acordo durante "anos". Finalmente, Sandra Montero (UXT) recoñece que xa se "esperaba" esta reacción da CIG, "coñecendo a súa política", pero insiste en que o documento final presentado pola Xunta "é un avance que non podemos rexeitar".
