Rueda converte o Debate do Estado da Nación no acto de saída da súa campaña electoral

O Debate do Estado da Nación tiña esta segunda feira a mirada posta en 2024, ano de eleccións galegas, máis que en 2023. Nomeadamente, o presidente galego, Alfonso Rueda, que no seu primeiro DEN comprometeu para o vindeiro ano axudas directas, rebaixas de impostos, subvencións ou apoios económicos, nun discurso que daba saída á carreira electoral. Recolleron a luva do presidente o BNG e o PSdeG. A portavoz nacional do BNG e líder da oposición, Ana Pontón, afirmou que o debate era "o punto final dun ciclo político, o epílogo dun PP que representa o pasado fronte ao BNG que representa o futuro ao lado da maioría social que quere cambio". Luís Álvarez, portavoz socialista na Cámara, avogou por "acabar con 14 anos dun Goberno galego pregado ao que diga Génova [sede do PP estatal]". Batería de anuncios En hora e 20 minutos de intervención, o presidente realizou 26 anuncios e promesas. Unha media de un anuncio ou promesa cada tres minutos, un ritmo máis propio dun atril nun acto en campaña electoral que da tribuna do Parlamento galego. Alfonso Rueda anunciou compromisos de todo tipo. Anuncios concretos, como que a Xunta da Galiza financiaría "un parque canino en cada unha das sete principais cidades", e outros máis imprecisos, como o de "xeneralizar a presenza de psicólogos en centros de día", sen ofrecer datos nin prazos. Comprometeu para 2024 plans estratéxicos para o turismo, 10.000 aulas dixitalizadas, 12 millóns en axudas a produtores de Tenreira Galega e tamén a creación dun "circuíto de difusión da cultura popular galega". Houbo anuncios para todos e todas: un bono de 5.000 euros anuais para as persoas con dependencia grande ou severa que sexan coidadas nos seus domicilios por familiares e un complemento de 1.200 euros ao ano para aquelas que teñan unha axuda para acudir á residencia. Un anuncio que chega tras as críticas á Xunta por parte de persoal e familias de usuarias por situar a Galiza á cola do Estado en investimento público en materia de dependencia. Tamén anunciou a creación dun 'carné +65' con descontos para persoas maiores, unha lei contra as adiccións en menores e un investimento nas universidades galegas de "como mínimo 1% do PIB". Ademais, comprometeu que declarará iniciativas prioritarias todos os proxectos industriais que cren máis de 25 postos de traballo e conten cun investimento inicial de máis de 2 millóns de euros, co cal recortaráselles os trámites administrativos. Pontón lembroulle que ese anuncio xa o fixera o PP en 2011, mais para empresas que creasen 250 empregos. PSdeG considera esgotado o proxecto de Rueda Por último, Rueda anunciou un fondo público-privado de apoio a proxectos empresariais dotado con 300 millóns de orzamento, dos cales o Goberno galego achegará o 10%. "Hai que crer no sector privado", afirmou. A batería de promesas non convenceu a oposición. Para Pontón, Rueda e as súas promesas eran un elo máis "en 14 anos de Gobernos do PP triturando o presente e futuro dun país. Que legado deixan? Tiveron tempo, catro lexislaturas con maioría. Tiveron recursos, 146.000 millóns. Tiveron a oportunidade de mellorar a vida das persoas e non o fixeron. Deixan unha Galiza peor", reprochou. "O cambio é imparábel" "O cambio é imparábel", afirmou a líder da oposición. "Reivindico a política con maiúscula, que serve ás maiorías e pon os intereses da Galiza por diante", dixo, para pasar a anunciar os "10 retos estratéxicos" que asume un "Goberno do BNG": benestar social, servizos públicos, autogoberno, economía produtiva, vangarda científica, acceso á vivenda, emerxencia climática, defensa da democracia... A líder nacionalista foi debullando propostas e medidas para unha"Galiza que merece un Goberno que funcione, con orgullo do país que somos". "Quero ser a presidenta desa Galiza posíbel, desa Galiza que queremos e merecemos", concluíu. Para Luís Álvarez, pola súa parte, o discurso do presidente volveu amosar que o Goberno galego "carece de propostas para revitalizar o país" e que o legado de Rueda será lembrado por "rebaixar os impostos aos millonarios". "Quita aos que menos teñen, para perdoar cartos aos millonarios. Alfonso Rueda, Robin Hood pero ao revés". "Un país desmoralizado" Álvarez tamén criticou que a "medida estrela" anunciada polo presidente fose "recuperar" o bono de coidados de 5.000 euros ao ano. "Primeiro reduciron as libranzas de coidadores á mínima expresión. Despois, suprimiron as cotizacións bonificadas á seguridade social para coidadores e, aínda por riba, atascaron todo o proceso de valoracións, de tal maneira que, cando chegan as axudas, algúns usuarios, por desgraza, xa faleceron", expuxo. Tamén houbo reaccións ao discurso de Rueda desde fóra do Parlamento. A Federación Galega de Municipios e Provincias (Fegamp), por exemplo, que lamentou que Alfonso Rueda non tivese nin unha soa referencia aos concellos. Da "Torre de marfil" ao "discurso que se esperaba" "Alfonso Rueda fixo hoxe [por onte] o discurso que os galegos e galegas esperaban do seu presidente". Alberto Pazos Couñago, portavoz parlamentario do Partido Popular (PP), saíu en defensa do líder do partido e presidente da Xunta da Galiza ante as críticas do BNG e PSdeG. Unhas críticas ante as que dixo estar "sorprendido", pois "o presidente falou de medidas que melloran a vida da xente". A líder da oposición e portavoz nacional do BNG, Ana Pontón, cualificou de "insulto á intelixencia" e "falta de respecto" ás galegas e galegos o "recital de anuncios, promesas e propaganda" cos que o presidente, Alfonso Rueda, tratou de "convencer" de que "vai facer todo" o que "non fixeron" durante os 14 anos de Gobernos do PP, ao que ve "dando os últimos coletazos". "Xestionaron 167.000 millóns nestes 14 anos e deixan unha Galiza peor", resumiu Pontón. Pola súa parte, Luís Álvarez (PSdeG) considerou o discurso do presidente da Xunta da Galiza "errado en todo: en diagnose e en medidas". "Debuxou un escenario propio de quen está nunha torre de marfil", valorou. Álvarez mostrouse convencido de que o de onte foi "o primeiro, o último e o único" discurso de Rueda como presidente galego nun Debate do Estado da Nación.