Hai semanas que algúns negocios do lecer nocturno da Galiza -os adscritos ao nivel máis alto de seguridade fronte o coronavirus para poder ter maior capacidade- viñan pedindo o certificado Covid, mais a partir desta sexta feira o levantamento do estado de alarma por parte da Xunta implica que vaia ser necesario presentar este 'pasaporte' en calquera estabelecemento do subsector.
Ao ampliarse ao 100% a capacidade en todos os pubs, discotecas e locais nocturnos do país, o Tribunal Superior de Xustiza da Galiza (TSXG) autorizou esta medida de control estipulada polo Goberno galego e o Comité Clínico.
Asúmese a necesidade de saír co certificado polo "plus" de risco que supón volver á normalidade en canto a capacidade da clientela, polo que é un sistema para garantir o menor perigo epidemiolóxico.
No fallo xudicial que transcendeu na tarde desta sexta feira explícase que o alcance da decisión para a cal o Goberno galego pediu autorización versa en que agora se "estende a todos os estabelecementos incluídos" nos dous niveis de seguridade (1 c e 2 c) e "non só" ao de maior seguridade, como cando este mesmo tribunal autorizou a medida anterior.
"O que ten a súa razón de ser, non pola evolución da situación sanitaria (que non empeorou), senón porque se incrementou a capacidade máxima de persoas permitidas niso establecementos, co consecuente aumento de risco na transmisión da enfermidade", destaca o documento xudicial.
Pola dificultade para renovar o aire
Os niveis mantéñense, aínda que a efectos só de fornecer información aos usuarios sobre o grao de compromiso do local fronte á Covid-19.
"En suma, a medida que se trae para a súa autorización non é nova, senón de maior alcance, e tampouco é de aplicación xeral ou indiscriminada, senón que se dirixe a unha soa actividade: o lecer nocturno, que se desenvolve en espazos nos que resulta dificultoso renovar o aire de forma natural, coa consecuente facilidade de que se transmita o virus por vía aeróxena, segundo aparece acreditado nos rigorosos estudos científicos aos que se refire o informe, de maneira que é evidente a utilidade da medida de prevención", sinala o TSXG.
Porén, segundo a orde publicada posteriormente pola Xunta no Diario Oficial da Galiza (DOG) aparece recollida unha excepción: non será preciso entregar esa información persoal sempre e cando se vaia permanecer na terraza dun determinado local sen acceder ao interior para nada.