Castañas, cogomelos e outros manxares que farán máis doada a fin do verán

A continuación seguen algunhas propostas que vos farán abrazar o outono e todas as súas delicias. Botarse ao monte O outono é tempo de botarse ao monte para pasear e apreciar as diferentes cores das árbores, e tamén para apañar castañas ou cogomelos. As castañas son o produto estrela desta estación. É tanta a súa popularidade entre as galegas e galegos que até teñen a súa propia festa, os magostos. Nestas celebracións que acontecen por todo o país a finais de outubro e comezos de novembro adoitan comerse asadas pero hai mil xeitos de gozar delas: crúas, secas, cocidas con leite ou incluso secándoas e moéndoas para facer fariña. Un xeito ben saboroso e orixinal para preparalas é en forma de flan. Para isto precisamos cocer e pelar as castañas, logo só temos que trituralas xunto ao resto dos ingredientes do flan e facelo ao baño maría. Ten unha textura moi cremosa e un delicioso e inconfundíbel sabor a castaña que fará as delicias dos máis lambóns. Para ir na procura de cogomelos temos que levar sempre unha navalla e ter coidado coas variedades non comestíbeis. O xeito ideal de collelos é cortalos pola base do pé e nunca arrincalos. Hai unha gran variedade deles aptos para o consumo, o que os converte nun ingrediente moi valorado na gastronomía de moitos países ao redor de todo o mundo. Podemos empregalos en infinidade de receitas: caldos, cremas, gornicións para peixes ou carnes… O modo máis sinxelo de desfrutalos con todo o seu sabor é salteados cun pouco de allo ou nun revolto. Un prato do que gosto especialmente é o rissotto de cogomelos con polbo. A mestura do arroz caldoso cociñado coa auga de cocer o polbo, o queixo e os cogomelos fan del un prato exquisito. Froitas, mel e viño Co final do verán chegan tamén outras froitas como as mazás, as peras, cítricos como as laranxas e os limóns ou froitos secos, como as noces ou as abelás. Estas son algunhas das ideas que vos propoño para aproveitar ao máximo todos estes produtos. As mazás asadas ao forno con azucre e un chisco de canela son outro prato ben típico do outono, ademais de ser sinxelas e apetitosas. Para os que vos apeteza algo un pouquiño máis elaborado hai unha sobremesa moi famosa en Austria e Alemaña chamada apfelstrudel ou strudel de mazá que é ben gorentosa. Consiste nunha masa enrolada chea por dentro de compota de mazá, azucre, uvas pasas e canela. Eu gosto tamén de engadir ao recheo abelás e noces en anacos. Cómese temperado e tamén se pode acompañar con xeado de vainilla, unha combinación suculenta. Aproveitando que xa temos viño novo, podemos cociñar un delicioso polo ao viño con peras. A combinación do froito da vide coas peras fai un mollo moi saboroso e ao cociñarmos o polo a lume baixo nesta salsa, conseguimos unha textura e un sabor espectaculares. O outono tamén é temporada de mel, e a mestura deste manxar con noces e laranxa é deliciosa. Unha receita que vos vai encantar para combinar estes sabores é a seguinte panna cotta. Significa nata cocida en italiano e é unha sobremesa moi famosa en Italia. Normalmente elabórase con crema de leite, azucre e xelatina pero na versión que vos propoño aromatizamos o leite con monda de laranxa e engadímoslle un chisco de zume, unha vez preparada botamos por enriba mel e noces. A Horta Na horta, aínda que non temos a vitalidade de meses como xullo ou agosto hai produtos como a coliflor, a cabaza ou as cenorias coas que podemos facer moitísimos pratos. Traio dúas propostas con estes básicos da horta. A primeira é unha típica crema de cabaza, aínda que desta vez engadímoslle cenorias, boniato e xenxibre. Só temos que refogar todos os ingredientes e logo cocelos ben e trituralos cun batedor. Podemos acompañala con queixo mozzarella e pementa moída por enriba ao gosto, quedaranos unha crema moi saudábel e cunha textura e un sabor excelentes. A outra é un falso cuscús. Este prato é moi famoso en Marrocos, no canto de cociñalo con sémola de trigo como é habitual imos facelo con coliflor. Só precisamos picar a coliflor cunha picadora e salteala na tixola acompañada do que máis nos guste, eu desta vez boteille cabaciña, cenoria e pasas. O que non pode faltar nunca nun bo cuscús son as especias, a min encántame o sabor e a cor tan vistosa que lle da o curry. Trátase dun prato moi versátil, tanto podemos comelo quente como frío, só como entrante ou de acompañamento dunha carne, por exemplo. Outra alternativa para cociñar a coliflor pode ser con bacallau, un prato ben típico do Nadal. A cabaza podemos empregala para case todo: lasañas, chulas ou incluso nun biscoito para facer tirsamisù. Estes son só algúns exemplos dos milleiros de cousas boas que o outono trae ás nosas mesas. Agardo que as probedes e que gostedes delas, e que así a fin do verán se vos faga máis lixeira.